(ඩී.ජී.සුගතපාල)
 
බුස්ස බන්ධනාගාරයේදි ජනාධිපතිවරයාට ආරක්ෂක ලේකම්වරයාට සහ බන්ධනාගාර දෙපාර්තමේන්තුවේ උසස් නිලධාරින් කිහිප දෙනෙකුට ප්‍රසිද්ධියේ මරණ තර්ජන එල්ල කිරිම සම්බන්ධ නඩුවේ 2වන සැකකරු ලෙස දරුණු ගණයේ අපරාධකරුවෙකු වන අරුමාහන්දි ජනිත් මධුසංක හෙවත් පොඩි ලැසී නමැත්තා නම් කරන ලෙස අපරාධ පරික්ෂණ දෙපාර්තමේන්තුව කරන ලද ඉල්ලිමක් සළකා බැලු ගාල්ල ප්‍රධාන මහේස්ත්‍රාත් හර්ෂණ  කැකුණවෙල මහතා සැකකරු එම නඩුවේ දෙවන සැකකරු ලෙස නම්කොට තව දුරටත් 25වනදින දක්වා රිමාන්ඩ් බන්ධනාගාර ගත කිරිමටත් අද (17) නියෝග කළේය.
 
ඉකුත් 8වනදින අපරාධ පරික්ෂණ දෙපාර්තමේන්තුව සහ නිතිපති දෙපාර්තමේන්තුව ගාල්ල මහේස්ත්‍රාත්අධිකරණයට කරුණු වාර්තා කරමින් කියා සිටියේ දරුණු ගණයේ අපරාධකරුවන් වන ධර්මකිර්තිගේ තාරක පෙරේරා විජේසේකර හෙවත් කොස්ගොඩ තාරක සහ අරුමාහන්දි ජනිත් මධුසංක හෙවත් පොඩි ලැසි යන දෙදෙනා ජනාධිපතිවරයාටත් ආරක්ෂිත ලේකම්වරයාටත් බන්ධානාගරයේ උසස් නිලධාරින්ටත් ප්‍රසිද්ධියේ මරණ තර්ජන කර ඇති බවය.
 
ඒ අනුව පොඩිලැසි නමැත්තාගෙන් බන්ධනාගාරයට ගොස් ප්‍රකාශයක් ලබා ගැනිමටත් අධිකරණයට ඉදිරිපත්කරන ලෙසටත් අපරාධ පරික්ෂණ දෙපාර්තමේන්තුව ඉල්ලා සිටියේය.
ඒ අනුව බන්ධානාගරයට ගොස් ප්‍රකාශ ලබා ගැනිමටත් ඔහු 25වනදින අධිකරණයට ඉදිරිපත් කරන ලෙසටත් මහසේත්‍රාත්වරයා එදින නියෝග කළේය.
 
මේ අතර අපරාධ පරික්ෂණ දෙපාර්තමේන්තුවේ මිනිමැරුම් විමර්ශන අංශයේ සහකාර පොලිස් අධිකාරි මෙරිල් රංජන් ළමාහේවා මහතා විසින්  ඉදිරිපත් කරන ලද මෝසමක් අනුව පොඩි ලැසි අද අධිකරණයට ඉදිරිපත් කරන ලදි.
 
එහිදි සහකාර පොලිස් අධිකාරි මෙරිල් රංජන් ළමාහේවා මහතා මෙම නඩුවේ දෙවන සැකකරු ලෙස පොඩි ලැසි නමැත්තා නම් කරන ලෙස අධිකරණයෙන් ඉල්ලා සිටියේය.ඒ අනුව පොඩි ලැසි නඩුවේ දෙවන සැකකරු ලෙස නම් කොට ඔහු තව දුරටත් 25වනදින දක්වා රිමාන්ඩ් බන්ධානාගරයේ තැබිමටත් මහෙස්ත්‍රාත්වරයා නියේග  කළේය.
 
අද  උදැසන සිටම ගාල්ල කොටුව බාල දක්ෂ මාවත සහ අධිකරණ සංකිර්ණය අසල දැඩි ආරක්ෂාව යොදවා තිබු අතර පොලිස් විශේෂ කාර්ය බලකායේ සහ පොලිස් නිලධාරින්ගේ දැඩි රැකවල් මැද පොඩි ලැසි අධිකරණයට රැගෙන එනලදි.
 
අධිකරණය පටන් ගැනිමෙන් පසු ආරම්භයේදිම අපරාධ පරික්ෂණ දෙපාර්තමේන්තුව ඉදිරිපත් කර තිබු මෝසම කැඳවනු ලැබු අතර සුදු  පැහැති ඇඳුමකින් සැරසි කොණ්ඩය උටඩ බැඳ සිටි  පොඩිලැසි බන්ධනාගාර නිලධාරින් විසින්  විත්තිකුඩුවට නංවන ලදි. මහේස්ත්‍රාත්වරයාගේ නියෝගය ප්‍රකාශ කිරිමෙන් පසු විශේෂ කාර්ය බලකායේ සහ පොලිසියේ දැඩි රැකවල් මැද පොඩි ලැසි  බලපිටිය අධිකරණයේ විභාග වන නඩුවකට ඉදිරිපත් කිරිම සඳහා ගෙන යන ලදී.