(ඩයනා උදයංගනී)

පාර්ලිමේන්තුව නියෝජනය කරන පක්‍ෂ නායකයින්ගේ රැස්වීමක් තමන් කැඳවූයේ නීත්‍යනුකූලව නොවන බව එම රැස්වීම අතරතුර කිහිපවරක්ම කතානායකවරයා පැවසූ බව රජයේ සම මාධ්‍ය ප‍්‍රකාශක මහින්ද සමරසිංහ මහතා පැවසීය.

  තමන් එය කැඳවූයේ නිල නොවන රැස්වීමක් ලෙස බව කතානායකවරයා පැවසූ බව ද මහින්ද සමරසිංහ මහතා සඳහන්  කළේය.

කතානායකවරයා විසින් කළ කැඳවීමක් අනුව පාර්ලිමේන්තු සංකීර්ණයේ දී අද (30) පැවති එම පක්‍ෂ නායක රැස්වීමට ආණ්ඩුව නියෝජනය කරන පක්‍ෂ වෙනුවෙන් තමන්, නිමල් සිරිපාල ද සිල්වා, විජයදාස රාජපක්‍ෂ, ඩග්ලස් දේවාන්දා, සරත් අමුණුගම යන අමාත්‍යවරුන් සහ දිනේෂ් ගුණවර්ධන මන්ත‍්‍රීවරයා ද සහභාගී වූ බව ඇමතිවරයා කීවේය.

පාර්ලිමේන්තුව ඉතා ඉක්මනින් කැඳවන ලෙස මන්ත‍්‍රීවරුන් 126කගේ අත්සනින් තමා වෙත ඉදිරිපත් කර ඇති ලිපිය ජනාධිපතිවරයා වෙත යවා ඇති බව මෙහිදී කතානායකවරයා පක්‍ෂ නායකයින්ට දැනුම් දුන් බව ද සමරසිංහ මහතා ප‍්‍රකාශ කළේය.

රජයේ සම මාධ්‍ය ප‍්‍රකාශක මහින්ද සමරසිංහ මහතා මේ බව පැවසුවේ රජයේ ප‍්‍රවෘත්ති දෙපාර්තමේන්තුවේදී අද (30) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

          පාර්ලිමේන්තුව කල්දැමීමේ ව්‍යවස්ථානුකූල බලය ජනාධිපතිවරයාට ඇති බව පිළිගැනීම සම්බන්ධයෙන් මෙහිදී තම කණ්ඩායම කතානායකවරයාට ස්තුතිය පළ කළ බවත්, ජනාධිපතිවරයා පාර්ලිමේන්තුව කල්දැමීමට කිසිවෙකුගෙන් හෝ විමසිය යුතු නැති බව කතානායකවරයාට දැනුම් දුන් බවත් ඇමතිවරයා කීවේය.

 අයවැයක් පිළියෙළ කිරීම ආදී කටයුතුවලට පාර්ලිමේන්තුව 16 වැනිදා දක්වා කල්තබා ඇති බව ද කතානායකවරයාට දැනුම් දුන් බව ඔහු සඳහන් කළේය.

හිටපු අග‍්‍රාමාත්‍යවරයා ඉවත් කිරීම, නව අගමැතිවරයෙකු පත්කිරීම ඇතුළුව ජනාධිපතිවරයා විසින් මේ වන තුරු ගත් සියලූ තීන්දු තීරණ ගෙන ඇත්තේ ව්‍යවස්ථානුකූලව හා රටේ නීතිය අනුව බව කතානායකවරයාට පෙන්වා දුන් බව ද හෙතෙම කීවේය.

 කතානායකවරයා කැඳවා තිබූ මෙම රැස්වීම විනාඩි 15කට පමණ සීමා වූ බව ද සමරසිංහ මහතා සඳහන්  කළේය.