(එම්.කේ. නන්දසේන)
       
දුරබැහැර බන්ධනාගාරවල සිට නිදහස් කිරීමට නිර්දේශිත රැඳවියන් 95 දෙනෙකු නිරෝධායනය සඳහා වීරවිල එළිමහන් සිර කදවුර වෙත රැගෙනවිත්  සිටියදී ඉන් 6දෙනෙක් ඔවුන්ගේ නිවෙස් වෙත යවන ලෙස ඉල්ලා සිටිමින් අද (08) උදෑසන සිට ආහාර ලබා ගැනීමේ වර්ජනයක නිරතව සිටිති.

අධිකරණ මගින් ඇප මත මුදා හැර ඇති මෙම රැඳවියන් 95 දෙනා දින 14ක් නිරෝධායනයට ලක්  කිරීමෙන් පසු නැවත කොළඹට රැගෙන ගොස් මුදා හැරීමට කටයුතු යොදා තිබිණ. මෙම රැඳවියන් පිරිස නිරෝධායන කාලය අවසන් වීමට දින දෙකකට පෙර දී එනම් ඉකුත් 05 දා, තිස්සමහාරාම සෞඛ්‍යය වෛද්‍ය නිලධාරි ප්‍රභාත් ලියනආරච්චි මහතා විසින් පී.සී.ආර්. පරීක්ෂණයකට ලක්කර ඇති අතර එම පිරිසෙන් 46 දෙනෙකුට කොරෝනා වයිරසය ආසාදනය වී ඇති බවට පරීක්ෂණ වාර්තා ලැබී ඇත. හඳුනා ගත් මෙම අසාදිත පිරිස ඊයේ (07දා) පස්වරුවේම පොළොන්නරුව ගල් ලෑල්ල ප්‍රතිකාර මධ්‍යස්ථානය වෙත රැගෙන ගිය බවද පැවසේ.
     
එම පිරිස නිවෙස් වෙත ගියහොත් පවුල් සාමාජිකයින් ඇතුළු ඥාති හිතවතුන් හටද වයිරසය පැතිරිය හැකි බවට සෞඛ්‍ය නිලධාරීහු සැක පහළ කරති.