නෙදර්ලන්තයේ යූට්රෙක්ට් නගරයේදී පුද්ගලයකු කළ වෙඩි තැබීමකින් එක් අයකු මියගොස් කිහිපදෙනකු තුවාල ලබා ඇතැයි විදෙස් පුවත් සේවා වාර්තා කරයි.

වෙඩි තැබීම වූ විගස ආරක්ෂක අංශ සහ හදිසි සේවා එම ස්ථානයට පැමිණි බව බී. බී. සී පුවත් සේවය වාර්තා කරයි.
  
වෙඩි තැබීමෙන් එක් පුද්ගලයකු මියගොස් ඇතැයි ද වෙඩි තැබීම කළ පුද්ගලයා පලාගොස් ඇතැයි ද ඔහු සොයා මෙහෙයුම් දියත් කර ඇතැයි ද  ප්‍රංශ පුවත් සේවය තවදුරටත් වාර්තා කර ඇත. 

මෙය බොහෝ දුරට ත්‍රස්ත ප්‍රහාරයක් විය හැකි යැයි ද නෙදර්ලන්ත පොලිස් ආරංචි මාර්ගවලින් කියැවේ. 

ආරක්ෂක අංශවලට සහ හදිසි සේවා අංශවලට ඔවුන්ගේ රාජකාරීවලට නිරත වීමට සහායවීමක් ලෙස ප්‍රධාන මාර්ගවලින් ඉවත්ව සිටින්නැයි එරට බලධාරීන්ගේ මහජනතාවගෙන් ඉල්ලා ඇතැයි ද වාර්තා වේ. 

සිදුවීම සම්බන්ධයෙන් එරට ප්‍රති ත්‍රස්ත ඒකකය හදිසි රැස්වීමක් කැඳවා ඇතැයි ද නෙදර්ලන්ත අග්‍රාමාත්‍ය මාර්ක් රට්ටේ වෙඩි තැබීම සම්බන්ධයෙන් සිය අවධානය යොමු කර ඇතැයි ද බී.බී.සී. පුවත් සේවය වාර්තා කරයි. 

(055)