(ඩයනා උදයංගනී)

නාගරික සංවර්ධන අධිකාරියේ නව සභාපති වශයෙන් හිටපු යුද හමුදා මාධ්‍ය ප්‍රකාශකවරයකු ද වන මේජර් ජෙනරාල් වී. උදය බී. නානායක්කාර මහතා පත්කරනු ලැබ ඇත.

ජනාධිපති ගෝඨාභය රාජපක්ෂ මහතාගේ උපදෙස් අනුව මෙම නව පත්වීම සිදුකර ඇති අතර නව සභාපතිවරයා වෙත පත්වීම් ලිපිය පිරිනැමීම සුහුරුපායේ පිහිටි එම අමාත්‍යාංශයේදී රාජ්‍ය අමාත්‍ය ආචාර්ය නාලක ගොඩහේවා මහතා අතින් අද (13) සිදුකෙරිණි.

නානායක්කාර මහතා හෙට (14) උදෑසන සිය ධූරයේ රාජකාරී භාර ගැනීමට නියමිතය.

කොළඹ රාජකීය විද්‍යාලයේ ආදි ශිෂ්‍යයකු වන නානායක්කාර මහතා ශිෂ්‍යභට නිලධාරියකු ලෙස 1981 දී ශ්‍රී ලංකා යුධ හමුදාවට එක්වූ අතර ඔහු ඉන්දියානු ආරක්ෂක කළමනාකරණ විද්‍යාලයේ සහ පාකිස්තානයේ ජාතික ආරක්ෂක විශ්ව විද්‍යාලයේ උපාධිධාරියෙකි.

මධ්‍යම පළාත් අඥාපති, මනෝවිද්‍යාත්මක මෙහෙයුම් අධ්‍යක්ෂ මණ්ඩලයේ අධ්‍යක්ෂ, ඉංජිනේරු රෙජිමේන්තු මධ්‍යස්ථාන සේනා විධායක වශයෙන් ද කටයුතු කර ඇති නානායක්කාර මහතා ශ්‍රී ලංකා ඉංජිනේරු බලකායේ බලසේනාධිපති ලෙස ‘552 මුහමලේ’ බළකායේත්, බලසේනාධිපති ලෙස 214 වන බලසේනාව “පරයාණකුලම්” බලකායේත්, ශ්‍රී ලංකා ඉංජිනේරු බලකායේ බලකාධිපති වශයෙනුත් කටයුතු කර ඇත.

මේජර් ජෙනරාල් උදය නනායක්කාර මහතාට උත්තම සේවා පදක්කම (යූඑස්පී), ශ්‍රී ලංකා සන්නද්ධ සේවා දීර්ඝ සේවා පදක්කම, රිවිරැස පදක්කම, පූර්ණ භූමි පදක්කම සහ උතුරු හා නැගෙනහිර මෙහෙයුම් පදක්කම ද හිමිව ඇති අතර ඔහු 2015 වසරේ යුධ හමුදාවෙන් විශ්‍රාම ගැනීමෙන් පසු පෞද්ගලික ක්ෂෙත්‍රයේ වසර 4 ක අත්දැකීම් රැසක් ද සහිතව නාගරික ජනාවාස සංවර්ධන අධිකාරියේ අධ්‍යක්ෂ ජනරාල්වරයා වශයෙන්ද, නාගරික සංවර්ධන අධිකාරියේ අතිරේක අධ්‍යක්ෂ ජනරාල්වරයෙකු වශයෙන් ද කටයුතු කර ඇත.