(එච්. එම්. ධර්මපාල)
 
ඉකුත් 28 වැනි දින අලුයම නුගේගොඩ ජම්බුගස්මුල්ල ප්‍රදේශයේදී ජීප් රථයකින් ගමන් කරමින් සිටි ව්‍යාපාරිකයකුට වෙඩි තබා ඝාතනය කිරීමට සහ තවත් ව්‍යාපාරිකයකුට බරපතල තුවාල සිදුකිරීමේ සිද්ධියට සම්බන්ධ සැකකරුවන් 7දෙනෙකු සහ සැකකාරියක, ඒ සදහා යොදාගත් වාහන 5ක් සහ අවි ආයුධ සමග අත්අඩංගුවට ගත් බව කොහුවල පොලිසිය කියයි.
 
සුපිරි වෑන් රථයක්, මෝටර් රථයක්, යතුරු පැදි දෙකක්, ත්‍රිරෝද රථයක් මෙන්ම දුරකථන 4ක්, පිස්තෝලයක්, ජීව උණ්ඩ 7ක් ද අත්අඩංගුවට ගෙන ඇත.
 
මොරටුමුල්ල, දෙහිවල, මත්තේගොඩ යන පොලිස් ස්ථානවල නිලධාරීන්ගේ ද සහාය ඇතිව සී.සී.ටී.වී දර්ශන උපයෝගී කරගනිමින් මොවුන් අත්අඩංගුවට ගත් බව පොලිසිය කියයි.
 
අත්අඩංගුවට ගත් සැකකරුවන් දෙහිවල, කොස්ගම, අම්බලන්ගොඩ, අහුංගල්ල යන ප්‍රදේශවල පදිංචි 23-45 අතර පසුවන අය බව අනාවරණය වී ඇත.
 
සිද්ධියෙන් මියගොස් ඇත්තේ නුගේගොඩ උඩහමුල්ල පදිංචි සුසිල් රුවන් පෙරේරා (38)යන අයය. තලපත්පිටිය පදිංචි ඉන්දික රොෂාන් (40) යන අය දකුණු කොළඹ ශික්ෂන රෝහලේ ප්‍රතිකාර ලබමින් සිටී.
 
සැකකරුවන් අද(05) මහේස්ත්‍රාත් අධිකරණයට ඉදිරිපත් කිරීමට නියමිතය.