(සුරංග රාජනායක)

ගම්පොල දොලුව හලියද්ද ක්‍රීඩාපිටිය මැද කොන්ක්‍රීට් දමා මුරකුටි සකස් කොට එම ක්‍රීඩා පිටිය අල්ලා ගැනීමට ගත් උත්සාහයට විරුද්ධ වූ ප්‍රදේශයේ තරුණ පිරිස එම කොන්ක්‍රිට් ඉවත්කරන තුරු ඉන්දියානු ජාතිකයන් හා ලංකා විදුලිබල මණ්ඩලයේ පිරිස රඳවා තබා ගත්හ.

මෙම තරුණ පිරිස කියා සිටියේ ප්‍රදේශයේ පාසල් හතරක දරු පිරිසකට හා දොළුව ප්‍රාදේශීය ලේකම් කාර්‍යාලයට මෙන්ම අවට ගම්මාන 15ක පිරිසකට ඇති එකම ක්‍රීඩාපිටිය ප්‍රයෝජනයට ගන්නා බව කියති.

රාත්‍රියේ නමයට පමණ ඉදිකිරීම් යන්ත්‍රයක් ගෙන්වා එම කොන්ක්‍රීට් තට්ටුව ඉවත් කරන ලදී.

මේ පිළිබඳව දොළුව ප්‍රාදේශීය ලේකම් යමුනා දයාරත්න මහත්මියගෙන් කළ විමසීමේදී ඇය පවසා සිටියේ ඉන්දියන් සමාගමක් හා විදුලිබල මණ්ඩලය එක්ව සිදුකරන ව්‍යාපෘතියකට මෙම ස්ථානය ඉල්ලා ඇති බවයි. දිස්ත්‍රික් කමිටුවේ හා ප්‍රාදේශීය සම්බන්ධීකරන කමිටුවේ ගත් තීරණයකට අනුව මෙම ක්‍රීඩාපිටියේ කොටසක් ඔවුන්ට ලබා දුන් බවද ඇය කීවාය.