(ටී.කේ.ජී.කපිල )

දුම්වැටි තොගයක් ඩුබායි සිට නීතිවිරෝධී ලෙස ශ්‍රී ලංකාවට ගෙන ආ මෙරට ව්‍යාපාරික කාන්තාවක සහ තවත් පුද්ගලයෙක්  අද (21)  කටුනායක ගුවන් තොටුපොළේ දී අත්අඩංගුවට ගත් බව රේගුව පවසයි.

අත්අඩංගුවට ගත්  35 හැවිරිදි පුද්ගලයා නාත්තන්ඩිය ප්‍රදේශයේ පදිංචිකරුවෙකු වන අතර , ව්‍යාපාරික කාන්තාව 52 හැවිරිදි හෙට්ටිපොළ ප්‍රදේශයේ පදිංචිකාරිනියකි .

ඔවුන් දෙදෙනා අද(21) දින උදෑසන 7.00 ට ඩුබායි සිට පැමිණි ෆ්ලයි ඩුබායි ගුවන් සේවයේ එෆ්.ඉසෙඩ් 547 දරණ  ගුවන් යානයෙන් කටුනායක ගුවන් තොටුපොළ වෙත පැමිණ , කිසිවක් ප්‍රකාශ කිරීමට නොමැති " හරිත මාවත " ඔස්සේ ගුවන් තොටුපොළෙන් පිටව යමින් සිටියදී රේගු නිලධාරීන් විසින් අත් අඩංගුවට ගෙන තිබුණි .

                 ඔවුන් දෙදෙනා  රැගෙන ආ ගමන් මලු දෙකක් තුළ රුපියල් 19,50,000 ක් වටිනා මෙම විදේශීය නිෂ්පාදිත දුම්වැටි 39,000 ක් අඩංගු දුම්වැටි කාටූන් 195 ක් සඟවා ගෙන සිටි බව රේගුව පවසයි .