(යොහාන් භාසුර)

ශ්‍රී ලංකා හිටපු තුන් ඉරියව් ක්‍රිකට් ක්‍රීඩක තිසර පෙරේරා ක්‍රිකට් ක්‍රීඩා කිරීම සඳහා ඇමරිකාවට යෑමට සූදානම් වන බව තමන්ට ද දැනගන්නට ලැබී ඇතැයි ශ්‍රී ලංකා ක්‍රිකට් ආයතනයේ ප්‍රකාශකයෙක් පැවසීය.

තිසර පසුගිය මාර්තු මස එක්දින සහ විස්සයි20 ජාත්‍යන්තර ක්‍රිකට් පිටියෙන් සමුගැනීමෙන් පසුව ශ්‍රී ලංකා ජාතික ක්‍රිකට් කණ්ඩායම නියෝජනය කළ බවට ශ්‍රී ලංකා ක්‍රිකට් ආයතනයෙන් සහතිකයක් ලබාගත් බව ද ශ්‍රී ලංකා ක්‍රිකට් ආයතනයේ නිලධාරියකු පැවසීය.

තවමත් 32 වැනි වියේ පසුවන තිසර 2012 වසරේ ටෙස්ට් ක්‍රිකට් පිටියෙන් ඉවත්ව මේ වසරේ මාර්තු මස දක්වා එක්දින සහ විස්සයි20 කණ්ඩායම් නියෝජනය කළේය. තිසර එක්දින ජාත්‍යන්තර තරග 166 කදී කඩුලු 175 ක් සහ විස්සයි20 ජාත්‍යන්තර තරග 84 කදී කඩුලු 51 ක් දවාගෙන තිබේ.

ප්‍රවේගකාරී පිතිකරුවෙක් වන තිසර ශතකයක් සහ අර්ධ ශතක 10 ක් සමගින් එක්දින ජාත්‍යන්තර ලකුණු 2338 ක් රැස්කිරීමට සමත්ව තිබේ.