අජන්ත කුමාර අගලකඩ

 

ලබන වසරේ ණය වාරික සහ පොළී ගෙවීමේ කිසිදු නොහැකියාවක් හෝ නීතිමය බාධාවක් නැතැයි මහ බැංකු අධිපති ඉන්ද්‍රජිත් කුමාරස්වාමි මහතා අද (21) කැබිනට් මණ්ඩලයට දැනුම් දී ඇතැයි වාර්තා වේ.

ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් අද උදේ පැවති කැබිනට් රැස්වීමට මහබැංකු අධිපති ඉන්ද්‍රජිත් කුමාරස්වාමි, මහබැංකු භාණ්ඩාගාර ලේකම් එස්.ආර්. ආටිගල ජනාධිපතිවරයාගේ ආර්ථික උපදේශක ආචාර්ය ලලිත් සමරකෝන් යන මහත්වරුන් ද සහභාගී වී ඇත.

එහිදී වත්මන් ආර්ථික තත්ත්වය ලබන වසරේ ණය හා පොලී ගෙවීම් ආදිය සම්බන්ධයෙන් ඔවුන් කැබිනට් මණ්ඩලය දැනුවත් කර ඇතැයි වාර්තා වේ.

ලබන ජනවාරි මාසයේ ණය වාරික සහ පොලී ගෙවීමට ප්‍රතිපාදන සපයා ගෙන ඇතැයි ද එහිදී මහබැංකු අධිපතිවරයා පෙන්වා දී ඇත.

ගෙන ඇති ණය සහ පොලී ගෙවීමට පාර්ලිමේන්තු අනුමැතියක් අවශ්‍ය නොවන බව මහා භාණ්ඩාගාර ලේකම්වරයා ද එහිදී ප්‍රකාශ කර ඇත.