ප්‍රංශයේ දකුණු දිග කොග්නැග් ප්‍රදේශයේ කළ කැණීමකදී ඩයිනෝසරයකුගේ විශාල ප්‍රමාණයේ කලවා අස්ථියක් සොයාගත් බව ප්‍රංශ පොසිල විද්‍යාඥයෝ පවසති.

ප්‍රාග් ඓතිහාසික යුගයේ සතුන් වාසය කළ බව සැලකෙන එම ප්‍රදේශය 2010 වසරේ සිට කැණීම් කරන ලද භූමියක් බවද ඔවුහු කියති.

මීටර් 2ක් පමණ දිග මෙම අස්ථිය, ශාක භක්ෂක, දිගු ගෙලක් සහ වල්ගය සහිත කටුසු ආකාරය දරන ඩයිනෝසර් විශේෂයකට අයත් බවද, වසර මිලියන 140කට ඉහතදී, ජුරාසික් යුගය අවසාන කාලයේදී පමණ මොවුන් සිටින්නට ඇතැයි විශ්වාස කරන බවද ඔවුහු කියාසිටිති.

‘මෙය දැවැන්ත සොයාගැනීමක්, මෙතරම් විශාල ඩයිනෝසර අස්ථියක් මෙලෙසින් සුරක්ෂිතව පැවතීම ගැන මම පුදුම වුණා’ පැරිසියේ ජාතික කෞතුකාගාරයේ පොසිල විද්‍යාඥ රෝනන් ඇලයින් මහතා පැවසීය.

ප්‍රංශයේ කොග්නැග් ප්‍රදේශයේ කැණීම් අවස්ථාවලදී එම යුගවල සිටි බව සැලකෙන සත්ව විශේෂ 40කට අයත් 7, 500ට අධික පොසිල ප්‍රමාණයක් සොයාගෙන ඇති බවද ඔහු කීය.

(රොයිටර් ඇසුරිනි) 

16844