ශ්‍රී ජයවර්ධනපුර විශ්ව විද්‍යාලයේ නවක සිසුන් පිළිගැනීම සඳහා පැවැති  උත්සවයකදී  සිසුවකුගේ  හිසේ ටයරයක් වැදී  බරපතල තුවාල ලැබීමේ සිද්ධිය සම්බන්ධයෙන්  මිරිහාන අපරාධ කොට්ඨාසය විමර්ශනයක් ආරම්භ කර ඇත.

ජ්‍යෙෂ්ඨ සිසුන් විසින් වීසි කළ  බව කියන ටයරයක්  හිසේ වැදීමෙන් බරපතල තුවාල වූ  පසිදු හිරුෂාන් (20) නැමැති  සිසුවා මේ වන විට කොළඹ ජාතික රෝහලේ  දැඩි සත්කාර ඒකකයේ ප්‍රතිකාර ලබමින් සිටී.  

සිසුවාගේ මොළයට හානි වී, අභ්‍යන්තර රුධිර වහනයක්ද වී ඇති බව රෝහල් ආරංචි මාර්ග පවසයි.

සිද්ධිය සම්බන්ධයෙන් විශ්වවිද්‍යාලයේ සිසුන් සහ ගිලන් රථයේ වෛද්‍ය නිලධාරීන්ගෙන් ප්‍රකාශ සටහන් කරගැනීමට නියමිත බව මිරිහාන පොලිසිය සඳහන් කරයි.

මෙම සිදුවීම සම්බන්ධයෙන් නුගේගොඩ මහේස්ත්‍රාත්වරයා දැනුවත් කිරීමට ද කටයුතු කරන බව පොලිසිය වැඩිදුරටත් පැවසීය.