ඉස්ලාමික් ස්ටේට් සංවිධානයේ ජිහාද් සාමාජිකයන් උමං හා බිම් ගෙවල්වලින් එළියට පැමිණ හමුදාවට බාර වෙමින් සිටින බව කුර්දි ප්‍රකාශකයෙක් අද (24) පැවැසීය. 
 
“කලිෆාව” පරාජයට පත් කර ඇති බව ප්‍රකාශ කිරීමෙන් දිනකට පසු එලෙස ජිහාද් සාමාජිකයෝ හමුදාවලට බාරවෙමින් සිටිති. 
 
අයි.එස් ජිහාද් සටන්කාමීන් නැගෙනහිර සිරියාවේ බගූස් ගම්මානයක සිර වී සිටින බව පසුගිය දින කිහිපයේදී වාර්තා විය.
 
සිරියාව අයි.එස්. සටන්කාමීන්ගේ ග්‍රහණයෙන් මුදා ගත් බවත් සිරියාවේ අයි.එස්. සංවිධානය සම්පූර්ණයෙන්ම පරාජයට පත් කළ බවත් ඇමෙරිකානු ජනාධිපති ඩොනල්ඞ් ට්‍රම්ප් සිකුරාදා (22) නිවේදනය කළේය.
 
ඇමෙරිකා එක්සත් ජනපදය ප්‍රමුඛ ඒකාබද්ධ හමුදා අයි.එස්. සංවිධානයේ අවසන් ඉලක්ක වෙත ගුවන් ප්‍රහාර මාලාවක් එල්ල කිරීමෙන් අනතුරුව ඇමෙරිකානු ජනාධිපතිවරයා එලෙස නිවේදනය කළේය. 
 
“අයි.එස්. සාමාජිකයන් බිම් ගෙවල් හා උමංවලින් පිටතට පැමිණෙමින් හමුදාවට බාර වෙමින් සිටිනවා” යැයි ඇමෙරිකා එක්සත් ජනපදයේ සහාය ලබන සිරියානු ප්‍රජාතන්ත්‍රවාදී බළකායේ ප්‍රකාශකයෙක් කීවේය. ඇමෙරිකාවෙව් සහාය ලබන කුර්දි හමුදා අයි.එස්. ග්‍රහණයේ පැවැති අවසන් ප්‍රදේශත් අල්ලා ගනිමින් සිටින බව තවදුරටත් වාර්තා විය. 
 
ජනවාරි 9 වැනිදායින් පසුව සිවිල් වැසියන් 66,000කට වැඩි පිරිසක් අයි.එස්. සංවිධානය අත්හැර හමුදාවලට බාර වී ඇතැයි  සිරියානු ප්‍රජාතන්ත්‍රවාදී බළකාය සඳහන් කළේය. 
 
ඔවුන් අතර ජිහාද් සටන්කාමීන් 5,000ක් වූ බවත් ඔවුන්ගේ ඥාතීන් 24,000 ක් සහ අයි.එස් සටන්කාමීන් සම්බන්ධයක් නොමැති සිවිල් වැසියන් 37,000 එම පිරිස අතර බව වූ පැවැසිණි.
ජිහාද් සටන්කාමීන් යැයි සැක කෙරෙන පිරිස් සහ ජිහාද් සටන්කාමීන් හමුදාව භාරයේ රඳවාගෙන ඇති අතර අනෙක් සිවිල් වැසියන් සියලු දෙනා අවතැන් කඳවුරු වෙත යොමු කර ඇත. 
 
ඒ.එෆ්.පී ඇසුරිනි  
055