(නාලක සංජීව දහනායක)

වහාම මහා මැතිවරණයක් පවත්වන්නැයි බලකරමින් ජාතික එකමුතුව සංවිධානය විසින් පවත්වන ලද ‘ජනවරමට අවසරයි’ මහජන රැළිය විශාල පිරිසකගේ සහභාගීත්වයෙන් මරදාන එල්ෆින්ස්ටන් රඟහල ඉදිරිපිටදී අද (3) පැවැත්විණ.

මරදාන, එල්ෆිනිස්ටන් රඟහල ඉදිරිපිට මහා මාර්ගය හරස්කරමින් ජනවරමට අවසරයි රැළියේ වේදිකාව ඉදිකර තිබුණි. මේ හේතුවෙන් කොළඹ,මරදාන ප‍්‍රධාන මාර්ගය හා ඒ අවට අතුරු මාර්ග සියල්ලේම දැඩි රථවාහන තදබදයක් ඇතිවී තිබුණි.

දිවයිනේ විවිධ ප‍්‍රදේශවලින් පැමිණි ජනතාවගෙන් කොළඹ, මරදාන ප‍්‍රධාන මාර්ගය පිරී ඉතිරී ගියේය. රෝහිත අබේගුණවර්ධන, බන්දුල ගුණවර්ධන,ටී.බී ඒකනායක, ප‍්‍රසන්න රණතුංග ඇතුලූ පාර්ලිමේන්තු මන්ත‍්‍රීවරුන් හා කංචන ජයරත්න සබරගමු පළාත් සභාවේ සභාපතිවරයාද ජනතාව දිරිමත් කරමින් රැස්වීම් භූමියේ රැඳී සිටිනු දක්නට ලැබුණි. 

පස්වරු 2.00 පමණ ‘ජනවරමට අවසරයි’ මහජන රැළිය ආරම්භ විය.

හිටපු අගවිනිසුරු සරත් එන්. සිල්වා, ශ්‍රී ලංකා යුද්ධ හමුදාවේ විශ‍්‍රාමික මේජර් ජෙනරල් බොනිෆස් පෙරේරා හා විශ‍්‍රාමික මේජර් ජෙනරල් කමල් ගුණරත්න, වෛද්‍ය සීතා අරඹේපොළ, මහාචාර්ය චන්න ජයසුමන,රංගන ශිල්පිනී අනුෂා දමයන්ති ඇතුලූ විවිධ ක්‍ෂේත‍්‍ර හා සංවිධානවලට සම්බන්ධ වෘතිකයන් හා කලාකරුවන්, ආගමික නායකයන් ඇතුලූ විශාල පිරිසක් මෙම රැළිය ආමන්ත‍්‍රණය කළහ.

ඡායාරූප - ගයාන් අමරසේකර