(හර්ෂණ තුෂාර සිල්වා)

ශ්‍රී ලංකාවේ හත්වැනි විධායක ජනාධිපතිවරයා තෝරාපත්කර ගැනීම සඳහා වන ඡන්ද විමසීම අද (16) උදෑසන 7ට ආරම්භ විය.

රටපුරා පිහිටුවා ඇති ඡන්ද පොළ මධ්‍යස්ථාන 12,848 කදී ඡන්ද විමසීම පැවැත්වන අතර ඡන්ද විමසීමේ කටයුතු පස්වරු 5 න් අවසන් වන බව මැතිවරණ කොමිසන් සභාව සඳහන් කරයි.

මෙවර ජනාධිපතිවරණයට වාර්තාගත ලෙස අපේක්ෂකයෝ 35 දෙනකු ඉදිරිපත් වී සිටිති. එය ශ්‍රී ලංකා දේශපාලන ඉතිහාසයේ ජනාධිපතිවරණයකට ඉදිරිපත් වූ වැඩිම අපේක්ෂකයන් ගණනය.

එම අපේක්ෂකයන් අතර භික්ෂූන් වහන්සේ දෙනමක් සහ කාන්තාවක් ද සිටිති.

ඡන්දය ප්‍රකාශ කිරීම සඳහා 15,992,096 සුදුසුකම් ලබා සිටිති. මෙවර ඡන්ද පත්‍රිකාව අඩි දෙකකට වඩා (සෙන්ටිමීටර 66) දීර්ඝ වන අතර එය ශ්‍රී ලංකා ඉතිහාසයේ දීර්ඝතම ඡන්ද පත්‍රිකාවය.

බලයේ සිටින ජනාධිපතිවරයා, අග්‍රාමාත්‍යවරයා සහ විපක්ෂ නායකවරයා තරග නොකරන ශ්‍රී ලංකා ඉතිහාසයේ පළමු ජනාධිපතිවරණය වන්නේ ද මෙවර ජනාධිපතිවරණයයි.

මැතිවරණ රාජකාරී සඳහා 150,000 කට වැඩි සංඛ්‍යාවක් යොදවා තිබෙන අතර ඡන්දය ගණනය කිරීමේ මධ්‍යස්ථාන 1550ක් ස්ථාපිත කර තිබේ.

ජනාධිපතිවරණයේ ආරක්ෂාව වෙනුවෙන් රටපුරා පොලිස් නිලධාරීන් 60,175 දෙනකු සිවිල් ආරක්ෂක බළකයේ භටයන් 8080 දෙනකු ද යොදවා ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී රුවන් ගුණසේකර මහතා ඊයේ (15) පැවැසීය.

මැතිවරණ කටයුතුවල ආරක්ෂාව වෙනුවෙන් සෑම ඡන්ද පොළකටම නිලධාරීන් දෙදෙනා බැගින් ඡන්ද පොළ රාජකාරී සඳහා 25,712ක් ද, පොලිස් ජංගම රාජකාරී සඳහා රථ 3043ක් වෙනුවෙන් පොලිසියේ 6086ක්, සිවිල් ආරක්ෂක සේවා නිලධාරීන් 6086 ක්, ගණන් කිරීමේ මධ්‍යස්ථාන 43ක් සඳහා පොලිස් අධිකාරීවරුන්, ජ්‍යෙෂ්ඨ පොලිස් අධිකාරීවරුන්, පොලිස් පරීක්ෂකවරුන් හා උප පොලිස් පරීක්ෂකවරුන් ඇතුළු නිලධාරීන් 2,197ක් යොදවා ඇති බව ද හෙතෙම කීය.

ජනාධිපතිවරණයේ සමස්ත වියදම රුපියල් කෝටි 750 ඉක්මවනු ඇතැයි මැතිවරණ කොමිසන් සභාව විසින් ඇස්තමේන්තු කරනු ලැබ තිබේ.

මේ අතර ජනාධිපතිවරණ අපේක්ෂකයන් සිය ප්‍රචාරණ කටයුතු සඳහා ඔක්තෝබර් 14 වැනිදා සිට නොවැම්බර් 8 වැනිදා දක්වා කාලයේදී රුපියල් කෝටි 169ක මුදලක් වැය කර ඇතැයි මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය ඉකුත් දා සඳහන් කළේය.

ඊට මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය, යුරෝපා සංගම් මැතිවරණ නිරීක්ෂණ කණ්ඩායම, පැෆරල් ආදී දෙස් විදෙස් මැතිවරණ නිරීක්ෂණ කණ්ඩායම් ජනාධිපතිවරණ මැතිවරණ කටයුතු නිරීක්ෂණය සඳහා එක්ව සිටී.

බදුල්ලේ ජනතාව ඡන්දය ප්‍රකාශ කළ අයුරු

(ඡායාරූප - පාලිත ආරියවංශ)

දඹුල්ලේ ජනතාව ඡන්දය ප්‍රකාශ කළ අයුරු

(ඡායාරූප - කාංචන ආරියදාස)

අනුරාධපුරේ ජනතාව ඡන්දය ප්‍රකාශ කළ අයුරු

(ඡායාරූප- මනුල වික්‍රම)

උතුරේ ජනතාව ඡන්දය ප්‍රකාශ කළ අයුරු

(ඡායාරූප- රෝමේෂ් මධුසංක)

වීරකැටියේ ජනතාව ඡන්දය ප්‍රකාශ කළ අයුරු

(ඡායාරූප- සනත් ගමගේ)

හැටන් ජනතාව ඡන්දය ප්‍රකාශ කළ අයුරු

(ඡායාරූප - සුදත් එච්.එම්.හේවා)

පුත්තලම ජනතාව ඡන්දය ප්‍රකාශ කළ අයුරු

(ඡායාරූප - හිරාන් ප්‍රියංකර ජයසිංහ)

මහනුවර ජනතාව ඡන්දය ප්‍රකාශ කළ අයුරු

(ඡායාරූප - මොහොමඩ් ආසික්)