(මනෝප‍්‍රිය ගුණසේකර)
 
ඞී.ඒ. රාජපක්‍ෂ ස්මාරකය ඉදිකිරීමේදී කෝටි තුනකට අධික මුදලක් අවභාවිතා කළේ යැයි ගෝඨාභය රාජපක්‍ෂ මහතා ඇතුළු හත්දෙනෙකුට එරෙහි නඩුවේ විත්තිකරුවන්ට එරෙහිව නිසි පරිදි චෝදනා ගොනු කර නොමැති බව සඳහන් කරමින් ගෝඨාභය රාජපක්‍ෂ මහතා හැර වෙනත් විත්තිකරුවන් සිව්දෙනෙකු විසින් ඉදිරිපත් කළ මූලික විරෝධතාවය පිළිබඳ තීන්දුව ලබන මැයි මස 07 වැනිදා ප‍්‍රකාශයට පත් කිරීමට ත‍්‍රිපුද්ගල විශේෂ මහාධිකරණය අද (28)  තීරණය කළේය.
 
සාධාරණ නඩු විභාගයක් සඳහා අවශ්‍ය ලේඛන 50,000 ක් පමණ විත්ති පාර්ශ්වයට ලබාදීමෙන් අනතුරුව විත්තිකරුවන්ට එරෙහි චෝදනා ගොනු කර මාස 07 කට පසු චෝදනා නිසි පරිදි ගොනු කර නොමැති බව සඳහන් කරමින් මූලික විරෝධතා මතු කරන්නේ මෙම නඩු විභාගය කල් යවා ගැනීමේ උපක‍්‍රමයක් වශයෙන් බව කියමින් පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පිරීස් මහතා ඉදිරිපත් කළ කරුණු සළකා බැලීමෙන් අනතුරුව විනිසුරු මඩුල්ල එලෙස නියම කළේය.
 
ගෝඨාභය රාජපක්‍ෂ මහතා වෙනුවෙන් පෙනී සිටි නීතීඥවරුන් මෙම නඩුව කැඳවනු ලැබූ මුල් අවස්ථාවේදීම සාමාන්‍ය නීතීය යටතේ පැවරිය යුතුව තිබූ නඩුවක් පළමු විත්තිකාර ගෝඨාභය රාජපක්‍ෂ මහතාගේ තත්වය අනුව ත‍්‍රිපුද්ගල විශේෂ මහාධිකරණයට ඉදිරිපත් කොට ඇතැයි කියමින් මුල් අවස්ථාවේදී ඉදිරිපත් කළ මුලික විරෝධතාවය ප‍්‍රතික්‍ෂේප කළ පසු දෙවැනි වතාවට මෙම මූලික විරෝධතාවය ඉදිරිපත් කර තිබිණි.
 
ත‍්‍රිපුද්ගල විශේෂ මහාධිකරණයේ විනිසුරු මඩුල්ලට මහාධිකරණ විනිසුරුවරුන් වන සම්පත් විජේරත්න (සභාපති විනිසුරු) සම්පත් අබේකෝන් සහ චම්පා ජානකී රාජරත්න යන මහත්ම මහත්මීහු ඇතුලත් වෙති.