(ක්‍රිෂාන්ජීවක ජයරුක්)

ශ්‍රී ලංකා කොමියුනිස්ට් පක්ෂයේ මාතර දිස්ත්‍රික් හිටපු නායක අභාවප්‍රාප්ත පාර්ලිමේන්තු මන්ත්‍රී චන්ද්‍රසිරි ගජධීර මහතාගෙන් පුරප්පාඩු වන මන්ත්‍රීධුරය සදහා දකුණු පළාත් සභාවේ හිටපු ක්‍රීඩා අමාත්‍ය මනෝජ් සිරිසේන මහතා පත් කෙරෙනු ඇති බවට එක්සත් ජනතා නිදහස් සන්ධානයේ දේශපාලන ආරංචි මාර්ග සදහන් කරයි.

විශේෂයෙන්ම පසුගිය මහ මැතිවරණයේ ප්‍රතිඵලවලට අනුව හය වැනි ස්ථානය දිනා ගෙන සිටින්නේ ජාතික ලැයිස්තුවෙන් පත් කළ පාර්ලිමේන්තු මන්ත්‍රී ලක්ෂ්මන් යාපා අබේවර්ධන මහතායි.

ඔහු ජාතික ලැයිස්තු පත් කළ මන්ත්‍රී ධුරයෙන් ඉවත් නොවන බවත් පුරප්පාඩු වූ මන්ත්‍රී ධුරය මනෝජ් සිරිසේන මහතාට හිමිවනු දැකීම තම අපේක්ෂාව බවත් මේ වන විටත් ප්‍රසිද්ධියේ ප්‍රකාශ කර ඇත.

ඒ සදහා සුබ පැතුම් එක් කර ලක්ෂ්මන් යාපා අබේවර්ධන මහතා තම ෆේස්බුක් ගිණුමේ සටහනක් ද යොදා තිබේ.

කෙසේ වෙතත් හිටපු දකුණු පළාත් ක්‍රීඩා අමාත්‍ය මනෝජ් සිරිසේන මහතා ශ්‍රී ලංකා නිදහස් පක්ෂයේ රැදී සිටිමින් ජනාධිපති මෛත්‍රිපාල සිරිසේන මහතාට සහාය පළ කරන මහජන නියෝජිතයෙකි.

ලක්ෂ්මන් යාපා අබේවර්ධන මහතා පසුගිය මහ මැතිවරණයෙන් පරාජයට පත් වූ පසු ජනාධිපති මෛත්‍රිපාල සිරිසේන මහතා විසින් ජාතික ලැයිස්තු මන්ත්‍රී ධූරයට පත් කළ අතර පසුව ඔහු ශ්‍රී ලංකා පොදුජන පෙරමුණට සහාය පළ කිරීමට එකතු වී සිටී.

කෙසේ වෙතත් පුරප්පාඩු මන්ත්‍රී ධුරයට මනෝජ් සිරිසේන මහතා පත් කළ පසු ශ්‍රී ලංකා නිදහස් පක්ෂයේ බලය තව දුරටත් ඉහළ යනු ඇති බවට දේශපාලන විචාරකයෝ පෙන්වා දෙති.