(කේ. බුද්ධික කුමාරසිරි)
 
කොස්ගම සාලාව රෝහලේ කාර්ය මණ්ඩලයට තර්ජනය කර, එහි ගිලන්රථ රියදුරුට සහ සහායකවරයාට පහරදී රෝහලට රැගෙන ආ මළ සිරුරක් බලහත්කාරයෙන් වෙනත් රෝහලකට ගෙන යාමේ සිද්ධියක් සම්බන්ධයෙන් පුද්ගලයින් 11 දෙනෙකු අද (07) සැකපිට අත්අඩංගුවට ගත් බව කොස්ගම පොලිසිය පවසයි.
 
කොස්ගම හෝටලයක කාර්ය මණ්ඩලය සඳහා පැවැති භෝජන සංග‍්‍රහයක් අතරතුරදී ඊට සහභාගී වූ නිලධාරියෙකු හදිසියේ රෝගී වී සාලාව රෝහලට ඇතුළත් කර තිබිණි. රෝගියා පරීක්ෂා කළ වෛද්‍යවරුන් ඔහු මිය ගොස් ඇතැයි රෝහලට ආ ඔහුගේ සගයන් පිරිසට පවසා ඇතත් ඔවුන් එය පිළි නොගෙන ඇති බවද පොලිසිය පවසයි.
 
පසුව එම පිරිස රෝගියා අවිස්සාවේල්ල මූලික රෝහලට රැගෙන යා යුතු බවට රෝහල් කාර්ය මණ්ඩලයට දැනුම් දුන්නද මිය ගිය අයෙකුගේ සිරුරක් එලෙස රැගෙන ගිය නොහැකි බවත් ඒ සඳහා යම් ක‍්‍රමවේදයක් පවතින බවත් කාර්ය මණ්ඩලය එම පිරිසට පවසා ඇත.
 
ඉන්පසු එම පිරිස මෙසේ කලහකාරී ලෙස හැසිරුණු බව විමර්ශනයේදි අනාවරණය වූ බවද පොලිසිය පවසයි.
 
අවිස්සාවේල්ල රෝහලේ වෛද්‍යවරුන්ද පවසා ඇත්තේ එම පුද්ගලයා මිය ගොස් ඇති බවය.
 
 සාලාව රෝහලේ කාර්ය මණ්ඩලය මෙම සිද්ධිය පාදක කරගනිමින් වැඩ වර්ජනයකට සූදානම් වූ අවස්ථාවේදී කොස්ගම පොලිසිය මැදිහත්ව නීතිය කි‍්‍රයාත්මක කරන බව පවසා එය නැවැත්වීමට කටයුතු කළ බවද පොලිසිය පවසයි.
 
ඒ අනුව හෝටලයේ ආරක්ෂක කැමරා පද්ධතිය පරීක්ෂා කර සංග‍්‍රහයට සහභාගී වූ පිරිස හඳුනා ගැනීමෙන් පසු පුද්ගලයින් 11 දෙනෙකු අත්අඩංගුවට ගත් බව පොලිසිය කියයි.
 
සැකකරුවන් අවිස්සාවේල්ල මහේස්ත‍්‍රාත් අධිකරණයට ඉදිරිපත් කිරීමට නියමිතය.