කවිතා සුබසිංහ 
 
කෝටි 500 දියමන්ති මංකොල්ලයේ ප්‍රධාන සැකකරු වන කැලුම් ඉන්දික නොහොත් “කැවුමා” අප්‍රෙල් 5 වැනි දා දක්වා තවදුරටත් රක්ෂිත බන්ධනාගාර ගත කරන ලෙස මහර ප්‍රධාන මහේස්ත්‍රාත් හේශාන්ත ද මැල් මහතා අද (22) නියම කළේය.

සැකකරු අද අධිකරණයට ඉදිරිපත් කිරිමෙන් අනතුරුව ඔහු වෙනුවෙන් පෙනී සිටි නීතිඥවරයා අධිකරණයට පවසා සිටියේ සැකකරු මාකඳුරේ මධූෂ්ගේ සමීපතමයකු බවට ජනමාධ්‍ය මඟින් ප්‍රචාරය වී ඇති හෙයින් මධූෂ්ට එරෙහි පතාල සාමාජිකයන්ගෙන් සැකකරුගේ ජීවිතයට මරණීය තර්ජන ඇති බවයි.

ඒ හෙයින් මහර බන්ධනාගාරයේ සිටින සැකකරු වෙනත් බන්ධනාගාරයකට මාරු කර යවන ලෙසත්, මෙම මරණීය තර්ජන මහර හා මැගසීන් බන්ධනාගාර දෙකේ ඇති බැවින් එම බන්ධනාගාරය හැර වෙනත් ඕනෑම බන්ධනාගාරයකට සැකකරු මාරු කරන ලෙසත් නීතිඥවරයා අධිකරණයෙන් ඉල්ලා සිටියේය.

සැකකරු අත්අඩංගුවට ගන්නා අවස්ථාවේ දී  හෙරොයින් ග්‍රෑම් 10 මිලිග්‍රෑම් 200ක් සන්තකයේ තිබී සොයා ගනු ලැබ තිබේ.
 
සැකකරු බී 3171 දරණ නඩුවට අදාළව මාර්තු 27 වැනි දා නුගේගොඩ මහෙස්ත්‍රාත් අධිකරණය වෙත ඉදිරිපත් කිරීමට නියෝග ලබාදෙන ලෙස මහරගම පොලිසිය විසින් විවෘත අධිකරණයේදී දී ඉල්ලීමක් ඉදිරිපත් කරන ලදී.
 
විත්තිය වෙනුවෙන් ඉදිරිපත් වු කරුණු සැළකිල්ලට ගත් මහේස්ත්‍රාත්වරයා විත්තිකරු වැලිකඩ හෝ කොළඹ රක්ෂිත බන්ධනාගාරයේ රඳවා තැබීමට නියොග කළ අතර මහරගම පොලිසියේ ඉල්ලීමට අනුව  මාර්තු 27 වැනි දා සැකකරු නුගේගොඩ මහෙස්ත්‍රාත් අධිකරණය වෙත ඉදිරිපත් කිරීමට ද අවසර ලබා දුන්නේය.
 
දොඩන්දූව වඩුගේ කැලුම් ඉන්දික සම්පත් නැමැත්තා කිරිබත්ගොඩ ප්‍රදේශයේ දී ඉකුත් 4 වැනි දා අත්අඩංගුවට ගෙන 5 වැනි දා මහර මහේස්ත්‍රාත් අධිකරණය වෙත ඉදිරිපත් කිරිමෙන් පසුව රැඳවුම් නියෝග මත රඳවා තබාගෙන ප්‍රශ්න කිරීමට නියෝග ලබා දී තිබු අතර 10 වැනි දා නැවතත් මහර මහේස්ත්‍රාත් අධිකරණය වෙත ඉදිරිපත් කිරීමෙන් පසු 22 වැනි දා රක්ෂිත බන්ධනාගාර ගතකර තිබිණි.