(සුජිත් හේවාජුලිගේ සහ  අංජුල මහික වීරරත්න)

කම්කරුවන්ට අනතුරුවලදී ගෙවන උපරිම වන්දි මුදල රුපියල්  ලක්ෂ 20 දක්වා ඉහළට  දැමීමට රජය තීරණය කර ඇත.

මේ සඳහා ප්‍රතිපාදන සැලසෙන කම්කරු වන්දි (සංශෝධන) පනත දෙවනවර කියවීම සදහා පාර්ලිමේන්තුවට ඉදිරිපත් කිරීමට කම්කරු කටයුතු පිළිබද අමාත්‍යාංශයීය උපදේශක කාරක සභාවේ එකඟත්වය පෙරේදා (23) හිමිවිය.

කම්කරු අමාත්‍ය  නිමල් සිරිපාල ද සිල්වා සහ රාජ්‍ය අමාත්‍ය  පියංකර ජයරත්න යන මහත්වරුන්ගේ ප්‍රධානත්වයෙන් කම්කරු කටයුතු පිළිබඳ අමාත්‍යාංශයීය උපදේශක කාරක සභාව පාර්ලිමේන්තු සංකීර්ණයේදී පෙරේදා රැස්විය.

මේ අවස්ථාවට හිටපු ජනාධිපති, පාර්ලිමේන්තු මන්ත්‍රී මෛත්‍රීපාල සිරිසේන,  පාර්ලිමේන්තු මන්ත්‍රීවරුන් වන ජෝන් සෙනෙවිරත්න, චාමර සම්පත් දසනායක, ශාන්ත බණ්ඩාර සහ වෛද්‍ය ගයාෂාන් නවනන්ද  යන මහත්වරුද සහභාගි වූහ.

සේවයේ යෙදී සිටියදී සිදුවන හදිසි අනතුරු හේතුවෙන් අගතියට පත්වන සේවකයන්ට මරණයකදී හෝ පූර්ණ බෙලහීනතාවකදී  දැනට ගෙවන උපරිම වන්දි ප්‍රමාණය රුපියල් පන්ලක්ෂ පනස් පන්  දහසකි.

එසේම දැනට රැකියා අවස්ථාවේදී පමණක් වන්දි ගෙවීමට ඇති ප්‍රතිපාදනය , රැකියා ස්ථානයට එන සහ යන අවස්ථා ඇතුළත් කර අර්ථ නිරූපණය වඩාත් පුළුල් කිරීමද  මේ හරහා සිදුවන බව කම්කරු අමාත්‍යාංශයේ   නිලධාරීහු  මෙහිදී පෙන්වා දුන්හ.

තවද වන්දි ගෙවීම ප්‍රමාද වීමේදී  අයකරන අධිභාරයන් සියයට 30 දක්වා වැඩි කිරීම ඇතුළු සංශෝධන කිහිපයක්ද මේ පනත මගින් සිදු කෙරේ.

ශ්‍රී ලංකා විදේශ සේවා නියුක්ති කාර්යාංශයේ සහ සේවක අර්ථසාධක අරමුදලේ වාර්ෂික වාර්තා කිහිපයක් සළකා බැලීමද මෙහිදී සිදුවිය.

මේ අවස්ථාවට හිටපු ජනාධිපති, පාර්ලිමේන්තු මන්ත්‍රී මෛත්‍රීපාල සිරිසේන,  පාර්ලිමේන්තු මන්ත්‍රීවරුන් වන ජෝන් සෙනෙවිරත්න, චාමර සම්පත් දසනායක, ශාන්ත බණ්ඩාර සහ වෛද්‍ය ගයාෂාන් නවනන්ද  කම්කරු අමාත්‍යාංශයේ ලේකම් මාපා පතිරණ යන මහත්වරුන්  ඇතුළු පිරිසක් ද සහභාගී වූහ.