(ජයන්ත සමරකෝන්)
 
නෙළුම් කුලුණ ව්‍යාපෘතිය ඉදිකිරිමේ දී රුපියල් මිලියන 200 ක් වංචාවක් සිදුවී ඇති බවට ජනාධිපති කළ ප්‍රකාශය ඒ මහතා නොමඟ යැවීමට කවුරුන් හෝ කළ කුමන්ත්‍රණයක් දැයි සැකයක් මතුව ඇති බැවින් ඒ ගැන සොයා බලා ස්වාධීන ජනාධිපති කොමිසමක් පත්කරන්නැයි පාර්ලිමේන්තු මන්ත්‍රී  බන්දුල ගුණවර්ධන මහතා අද (17) ජනාධිපතිගෙන් ඉල්ලා සිටියේය.

එහි වාර්තාව සති දෙකක් තුළ ලබාගත යුතු බවද  මන්ත්‍රීවරයා දැනුම් දුන්නේය. මෙම බරපතල ප්‍රකාශය හේතුවෙන් ශ්‍රී ලංකාව හා චීන රජයේ අභිමානයට බලවත් කැළලක් සිදුවී ඇතැයි ද චීන රජයෙන් ඒ සඳහා පැහැදිලි කිරිමක් බලාපොරොත්තු වන බවද මන්ත්‍රීවරයා සඳහන් කළේය.

විපක්ෂ නායක මහින්ද රාජපක්ෂ මහතා විසින් මේ සම්බන්ධයෙන් අද විශේෂ නිවේදනයක් නිකුත් කිරිමට නියමිත බවද කී මන්ත්‍රීවරයා විදුලි සංදේශ නියාමන කොමිසමේ එවකට අධ්‍යක්ෂ ජනරාල් ලෙස කටයුතු කළ අනුෂ පැල්පිට මහතා සිය මුහුණු පොතේ සටහනක් තබමින් මේ පිළිබඳ සැබෑ තත්ත්වය හෙළිකර ඇතැයි ද ඔහු කීවේය.