(තරිඳු ජයවර්ධන)

බලංගොඩ මොරහැල උඩවෙල සණස බැංකුවෙන් රුපියල් කෝටි 15ක මුදලක් රැගෙන පළා ගිය බව කියන එහි හිටපු කළමනාකාරිනිය මාස අටකට පමණ පසු අද (06) සවස අත්අඩංගුවට ගත් බව පින්නවල පොලිසිය කියයි.

සැකකාර හිටපු කළමනාකාරිනිය සිය දරුවකු උසස් පෙළ විභාගයට යොමු කිරීමට පැමිණ සිටිය දී මෙලෙස අත්අඩංගුවට ගත් බව පොලිසිය සඳහන් කරයි.

බලංගොඩ මොරහැල උඩවෙල සණස බැංකුවේ තැම්පත්කරුවන් දහසකට ආසන්න සංඛ්‍යාවකගේ කෝටි 15කට ආසන්න මුදලක් රැගෙන එහි කළමනාකරිනිය පළා ගොස් ඇතැයි පොලිසියට පැමිණිලි ලැබී ඇත්තේ 2018 නොවැම්බර් මාසයේ දී ය.

සැකකාරියගේ විදෙස් ගමන් තහනම් කර නියෝගයක් ලබාගෙන විමර්ශන සිදු කළ බවත්, ඇය තම දරුවා උසස්පෙළ විභාගයට යොමු කිරීම සඳහා පැමිණ ඇතැයි ලද තොරතුරක් අනුව මෙලෙස අත්අඩංගුවට ගත් බවත් පොලිසිය කියයි.

ප්‍රකාශ සටහන් කිරීමෙන් පසු සැකකාරිය හෙට (07) අධිකරණයට ඉදිරිපත් කිරීමට නියමිතය.  රත්නපුර කොට්ඨාස භාර පොලිස් අධිකාරී සුදත් මාසිංහ මහතාගේ අධීක්ෂණයෙන් පින්නවල පොලිස් ස්ථානාධිපති පොලිස් පරීක්ෂක එච් පී අමරතුංග මහතා ඇතුළු කණ්ඩායමක් විමර්ශන පවත්වා සැකකාරිය අත්අඩංගුවට ගෙන තිබේ.