(ප්‍රියානි මංගලිකා)
         
කොටවෙහෙර ප්‍රදේශයේ දී 13වියැති දැරියකට අමානුෂික ලෙස පහර දුන් බවට රිමාන්ඩ් බාරයේ සිටි ග්‍රාම නිලධාරිනිය සහ ඇගේ සහෝදරිය සහ  දැරියගේ සුළු මව රුපියල් ලක්ෂය බැගින් වූ ශරීර ඇප හතරක් මත මුදාහරින  ලෙස නිකවැරටිය මහේස්ත්‍රාත් සසිකා ලක්මාලි දසනායක මහත්මිය  අද(13)නියෝග කළාය.

ඔවුන්ට ලබන 26 දින යළි අධිකරණයේ පෙනී සිටින ලෙසද, සිද්ධිය සම්බන්ධයෙන් දැනට ළමා නිවාසයක රඳවා සිටින අගතියට පත් දැරිය තවදුරටත් එම  ළමා නිවාසයේම රඳවා තබන ලෙසද ඇය නියෝග කළාය.

මෙලෙස ශරීර ඇප  මත මුදා හරිනු ලැබුවේ, කොටවෙහෙර , අලුත්ගම ප්‍රදේශයේ  පදිංචි ග්‍රාම නිලධාරිනිය වන ඩී.එම්.මානෙල් රත්න කුමාරි සහ ඇගේ සහෝදරිය මෙන්ම දැරියගේ සුළු මව වන ඩී.එම්.නිල්මිණි රත්න කුමාරි යන දෙදෙනාය.

සාක්ෂි කරුවන්ට, දැරියට හෝ පරීක්ෂණ කටයුතුවලට කිසිඳු බලපෑමක් නොකරන ලෙසද ,එසේ කළහොත් ඇප අවලංගු කර, යළි බන්ධනාගාර ගත කරන බවටද , සැකකාරියන්ට අධිකරණයෙන් තරයේ අවවාද කෙරිණි.

නිකවැරටිය කොට්ඨාසය බාර ජ්‍යෙෂ්ඨ පොලිස් අධිකාරී උපුල් චන්දන අබේසිංහ මහතාගේ උපදෙස් අනුව සහකාර පොලිස් අධිකාරී එල් අමරකෝන් මහතාගේ අධීක්ෂණයෙන් ස්ථානාධිපති පොලිස් පරීක්ෂක කහඳවල මහතාගේ මෙහෙයවීමෙන්, ළමා හා කාන්තා කාරියාංශයේ ස්ථානාධිපති උප පොලිස් පරීක්ෂක බුද්ධිකා  ඇතුලු නිලධාරීන් කණ්ඩායමක් පරීක්ෂණ මෙහෙයවූහ.
         
කොටවෙහෙර පොලීසිය නඩුව පවරා තිබුණි.