අනීෂා මානගේ

වීරකැටිය රාජපක්ෂ ප්‍රාථමික විද්‍යාලයේ පළමු ශ්‍රේණියට දරුවන් දහහතර දෙනකු ඇතුළත් කර නොගැනීම නිසා එයට විරෝධය දැක්වීම සඳහා මාරාන්තික උපවාසයේ නිරත වූ පියවරු දෙදෙනාගෙන් අනෙක් පුද්ගලයාද අද(7) දහවල් අසාධ්‍ය සෞඛ්‍ය තත්ත්වය හේතුවෙන් වීරකැටිය දිස්ත්‍රීක් රෝහලට ඇතුළත් කළේය.

මෙලෙස මාරාන්තික උපවාසයේ නිරත වීම නිසා අසාධ්‍ය සෞඛ්‍ය තත්ත්වය හේතුවෙන් රෝහල්ගත කළේ වීරකැටිය කුඩාබැඳිවැව ප්‍රදේශයේ පදිංචි මංජුල ලක්මාල්(31) නම් පියෙකි.

අද උදෑසන ද මෙලෙස මාරාන්තික උපවාසයේ යෙදී සිටි පියෙකු රෝහල්ගත කිරීමට මවුපියවරු පියවර ගත්හ. සුවසැරිය ගිලන් රථයකින් මොවුන් දෙදෙනා රෝහල්ගත කිරීමට අනෙක් මවුපියවරු පියවර ගත්හ.

වීරකැටිය ප්‍රාථමික විද්‍යාලය ආසන්නයේ ප්‍රධාන මාර්ගය අයිනේ අට්ටාලයක් ගසාගෙන එය තුළ රැඳී සිටිමින් මාරාන්තික උපවාසයේ නිරත වන අයට දෙදෙනාට සහය පළ කරමින් තවමත් පාසලක් නොමැති දරුවන් දහහතර සහ එම දරුවන්ගේ මව්පියවරු පිරිසක් රැඳි සිටිති. අසාධ්‍ය වී රෝහල්ගත කළ දෙදෙනා වෙනුවට තවත් දෙදෙනකු උපවාසයට වාඩි වූයේය.

මාරාන්තික උපවාසය පැවැති ස්ථානයට වීරකැටිය පොලිස් ස්ථානයේ ස්ථානාධිපති ප්‍රධාන පොලිස් පරීක්ෂක රසික සම්පත් මහතා පැමිණි අතර ස්ථානාධිපතිවරයාගේ මැදිහත්වීමෙන් වලස්මුල්ල කලාප අධ්‍යාපන කාර්යාලයේ සහකාර අධ්‍යාපන අධ්‍යක්ෂිකා සෙව්වන්දි මහත්මිය සහ තවත් නිලධාරිනියක් පැමිණියහ.

මෙම දරුවන් පාසලට ඇතුළත් කර ගැනීම සම්බන්ධයෙන් ලබන 11 වැනිදා කමිටු රැස්වීමක් කැඳවා පරීක්ෂණයක් කරන අතර එහිදි මවුපියන්ගේ ගැටළු ඉදිරිපත් කිරීමට කටයුතු කරන ලෙස දැන්වීය.

එතෙක් මෙම දරුවන්ට වෙනත් පාසලක් ලබා දීමට කටයුතු කරන බවද පරීක්ෂණයෙන් පසුව වීරකැටිය රාජපක්ෂ ප්‍රාථමික විද්‍යාලය හිමිවන දරුවන්ට අනෙක් පාසලෙන් අස්වීම සඳහා ද අවසර ලබා දෙන බවට දැන්වීය.

එසේ වුවද එම තීරණයටද එකඟ නොවූ මවුපියවරු තවදුරටත් මාරාන්තික උපවාසය අත්නොහැරීමට පියවර ගත්හ.