(ඉන්දිකා රාමනායක)

නීති විරෝධී ලෙස ශ්‍රී ලංකා මුහුදු සීමාව උල්ලංඝනය කර ධීවර කටයුතු වල නිරත වෙමින් තිබියදී  අත්අඩංගුවට ගත් ඉන්දීය ධීවරයන් සතු යාත්‍රා 202 ක්  නාවික හමුදාව බාරයේ  තිබෙන බව නාවික හමුදාව පවසයි.

ධීවර යාත්‍රා 140 ක්  නීතිමය කටයුතු  නිමාකර අධිකරණයෙන් නිදහස් කර  ඉන්දියාට රැගෙන යාමට නියමිත ඒවා බව නාවික හමුදා මාධ්‍ය ප්‍රකාශක ලුතිනන් කමාන්ඩර්  ඉසුරු සුරියබණ්ඩාර මහතා පැවසීය.‍

තවත්  ධීවර  යාත්‍රා 51 සම්බන්ධයෙන් අධිකරණ කටයුතු  නිමා කර ඇති බවත් තවත් යාත්‍රා 11 ක් සම්බන්ධයෙන් අධිකරණය කටයුතු සිදුකරමින් පවතින බවද නාවික හමුදා මාධ්‍ය ප්‍රකාශකවරයා කියා සිටියේය.

ඉන්දීය ධීවරයින් මෙරට මුහුදු සීමාව උල්ලංඝනය කරමින් ධීවර කටයුතු වල නිරතවීම හේතුවෙන් මෙරට ධීවරයින් නොයෙක්  ගැටළු වලට මුහුණ දෙන බවත්  ඒ සම්බන්ධයෙන් පියවර ගන්නා ලෙසට  ඔවුන් ප්‍රදේශීය  ධීවර කාර්යාලයට හා නාවික හමුදාව වෙත සංදේශ බාර දී තිබූ බවත් නාවික හමුදා මාධ්‍ය ප්‍රකාශකවරයා කියා සිටියේය.

මෙරට මුහුදු සීමාව උල්ලංඝනය  කරමින්  සිටින ධීවරයින් අත්අඩංගුවට ගැනීම සම්බන්ධයෙන් නාවික හමුදාව වෙත මාධ්‍ය මගින් චෝදනා එල්ල කළ ද  නාවික හමුදාව එම කටයුතු  සිදුකරන්නේ  ධීවර පනතේ  ප්‍රතිපාදන අනුව බවද නාවික හමුදා මාධ්‍ය ප්‍රකාශකවරයා  සඳහන් කළේය.

නාවික හමුදාවට මේ සම්බන්ධයෙන් වැඩි වශයෙන් චෝදනා එල්ල කරන්නේ ඉන්දීය මාධ්‍ය මගින් බවද  හෙතෙම කියා සිටියේය.

මේ සම්න්ධයෙන්  ඉදිරියේ දී නාවික හමුදාව අවශ්‍ය කටයුතු සිදුකරන බවත් එය නාවික හමුදාවේ වගකීමක් බවත් හෙතෙම වැඩිදුරටත් කියා සිටියේය.

නාවික හමුදා මාධ්‍ය ප්‍රකාශකවරයා මේ බව කියා සිටියේ අද (27) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකදීය.