(ඉන්දිකා රාමනායක)
 
දූනගහ, දිවුලපිටිය ප‍්‍රදේශයේ මත්කුඩු ජාවාරම් හා අපරාධවල නිරත සංවිධානාත්මක අපරාධ කල්ලි සාමාජිකයකු වූ ‘ආමි  සමන්ත’ නැමැත්තා  දිවුලපිටියේ, බඩල්ගම ප‍්‍රදේශයේ දී විශේෂ කාර්ය බලකා විශේෂ කණ්ඩායමක් අද (19)  අත්අඩංගුවට ගත් බව  එම බලකාය පවසයි.
 
සැකකරු සන්තකයේ තිබී  හෙරොයින් ග‍්‍රෑම් 200 ක් යුද හමුදා  නිල ඇඳුමක බඳපටියක්, තොප්පියක්,  හමුදා නිල ඇඳුම සමඟ භාවිත කරන  බෑගයක්  විශේෂ කාර්ය බලකාය බාරයට ගෙන තිබිණි.
 
‘ආමි සමන්ත’ නැමැත්තා ‘මාකඳුරේ මධුෂ්’ හා  ‘දූනගහ සුජී’ නැමැති  සංවිධානාත්මක අපරාධ කල්ලි සාමාජිකයන්ගෙන් සමීපතමයෙකු බවද විශේෂ කාර්ය බලකාය පවසයි.
 
සැකකරු ඔවුන් සමග එක්ව මිනීමරුම්, කොල්ලකෑම්, මත්කුඩු ජාවාරම් ඇතුළු අපරාධ රැසක් කර ඇති බවත්  එම අපරාධ සම්බන්ධයෙන් නඩු පවතින බවත් පැවසේ.
 
සැකකරු  අපරාධ සම්බන්ධයෙන්  වසර 14 ක් බන්ධනාගාර ගතව සිටි පැමිණි  පුද්ගලයකු බවත් විශේෂ කාර්ය බලකාය පවසයි.