( දයාරත්න ඇඹෝගම )

 
පළමු ශ්‍රේණියට සිසුන් ඇතුළත් කිරීම සම්බන්ධයෙන් අධ්‍යාපන අමාත්‍යාංශයේ ලේකම්වරයා නිකුත් කර ඇති අංක 24 / 2018 චක්‍රලේඛය හේතුවෙන් අනුරාධපුර නගරයේ සහ ඒ පාසල් ආසන්නයේ වෙසෙන දරුවන් 300 කට අධික පිරිසකට ළඟම  පිහිටි පාසැලට ඇතුළුවීමේ අවස්ථාව අහිමිවී ඇතැයි ලංකා ගුරු සංගමය චෝදනා කරයි.
                      
එම චක්‍ර ලේඛයේ සඳහන් වන්නේ දරුවාගේ පදිංචිය සනාථ කිරීම සදහා සින්නක්කර ඔප්පුව, තෑගි ඔප්පුව, දීමනා පත්‍රය, රජයේ ප්‍රදාන, දේවාල ගම් පනත යටතේ පැවරූ ඔප්පු ඉදිරිපත් කර පදිංචිය සනාථ කළ යුතු බවයි. පදිංචිය සනාථ කිරීම වෙනුවෙන් දරුවාට ලැබෙන ලකුණු ප්‍රමාණය 30කි.
                                              
එහෙත් අනුරාධපුර දිස්ත්‍රික්කයේ බොහෝ දෙමාපියන්ට ඇත්තේ ප්‍රාදේශීය ලේකම්වරයා විසින් නිකුත් කර ඇති තාවකාලික බලපත්‍ර පමණි.  
                             
පාසල ආසන්නයේම පදිංචිව සිටියද පදිංචිය තහවුරු කිරීමේ නොහැකියාව නිසා මේ නිසා අනුරාධපුර, නොච්චියාගම, තඹුත්තේගම හා කැකිරාව වැනි නගරවල පාසල් ආසන්නයේ ජීවත්වන බොහෝ දරුවන්ට ගමේ පාසලට යාමේ අවස්ථාව අහිමිව ඇත.      
                                           
මේ සම්බන්ධයෙන් අදහස් දක්වමින් ලංකා ගුරු සංගමයේ සභාපති ප්‍රියන්ත ප්‍රනාන්දු මහතා මෙසේ පැවසීය.     
                              
“අධ්‍යාපන අමාත්‍යාංශයේ ලේකම්වරයා විසින් නිකුත් කර ඇති චක්‍ර ලේඛයේ සඳහන් පරිදි සින්නක්කර ඔප්පු, තෑගි ඔප්පු, දීමනා පත්‍ර අනුරාධපුර නගරය හා තදාසන්න ප්‍රදේශවල ජනතාවට නැහැ. ඔවුන්ට ඇත්තේ ප්‍රාදේශීය ලේකම්වරයා නිකුත් කළ තාවකාලික බලපත්‍ර.

මේ නිසා දරුවන් 300 කට අධික පිරිසකට ළඟම පාසල අහිමි වෙලා තිබෙනවා. පළමු ශ්‍රේණියේ දරුවෙකු නිවස දුර පාසලකට රැගෙන යාම දෙමාපියන්ට අපහසුවක්.  
              
පළාත් අධ්‍යාපන අධ්‍යක්ෂ, කලාප අධ්‍යාපන අධ්‍යක්ෂකවරු මේ පදිංචිය පිළිබඳව සොයා බලා මේ දරුවන්ට ළඟම පාසල ලබාදිය යුතුයි”  යැයි ප්‍රියන්ත ප්‍රනාන්දු මහතා  පැවසීය.