(ඩයනා උදයංගනී)

කොවිඩ් 19 වසංගත තත්වය හමුවේ අන්තර් පළාත් මගී බස් රථ ධාවන කටයුතු අඛණ්ඩව පවත්වාගෙන යාම සඳහා බස් ධාවකයින් වෙත සහන සැලසීමට අමාත්‍ය මණ්ඩලය තීරණය කළ බව සම කැබිනට් ප්‍රකාශක, බලශක්ති අමාත්‍ය, උදය ගම්මන්පිල මහතා පවසයි.

වාර්ෂික ටෙන්ඩර් ගාස්තුවෙන් සහ අධිවේගී මාර්ගයේ තාවකාලික අවසර පත්‍ර ගාස්තුවෙන් සියයට 50ක් පමණක් අය කිරීමට මේ අනුව තීරණය කළ බව අමාත්‍යවරයා සඳහන් කළේය. මෙම සහනය ඉකුත් අප්‍රේල් 1 වැනිදා සිට ලබන සැප්තැම්බර් මස 31 වැනිදා දක්වා ක්‍රියාත්මක බව අමාත්‍යවරයා කීවේය.

අමාත්‍ය උදය ගම්මන්පිල මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (11) පැවති කැබිනට් තීරණ දැනුම්දීමේ මාධ්‍ය හමුව අමතමිනි.

බස් රථ ධාවකයින්ට මීට පෙරද ඉකුත් මාර්තු මස 31 වැනිදා තෙක් හඳුනාගත සහන ලබාදීමට කටයුතු කර තිබූ අතර කොවිඩ් 19 වසංගතයේ බලපෑමෙන් බස් රථ ධාවනය තවමත් විධිමත් ආකාරයෙන් සිදුනොවීම සැලකිල්ලට ගෙන මෙම පියවර ගත් බව ඇමතිවරයා සඳහන් කළේය.