(රන්ජන් කස්තුරි) 

රෝහල්, ආරක්ෂක ස්ථාන සහ ආයෝජන ප්‍රවර්ධන කලාප වැනි අත්‍යවශ්‍ය ස්ථානවලට කිසිදු කප්පාදුවකින් තොරව විදුලිය සැපයීමට අවශ්‍ය පියවර ගැනීම සඳහා විශේෂ මෙහෙයුම් මැදිරියක් ක්‍රියාත්මක කරන බව විදුලිබල අමාත්‍ය පවිත්‍රා වන්නිආරච්චි මහත්මිය කීවාය.

එම විශේෂ මෙහෙයුම් මැදිරිය කොළඹ විදුලිබල අමාත්‍යාංශ පරිශ්‍ර යේ ස්ථාපිත කරන බවද අැමැතිවරිය පැවැසුවාය. 
පවතින වියළි කාලගුණික තත්ත්වය යටතේ අඛණ්ඩ විදුලි සැපයුමක් ලබාදීම දුෂ්කර වුවද අත්‍යවශ්‍ය සේවාවන් සඳහා අඛණ්ඩ විදුලි සැපයුමක් ලබාදිය යුතු බවද ඇමැතිවරිය සඳහන් කළාය.
අත්‍යවශ්‍ය ආයතනවල නියෝජිතයන්ගෙන් සැඳුම්ලත්ව එම විශේෂ මෙහෙයුම් මැදිරියේ  කටයුතු අඛණ්ඩව ක්‍රියාත්මක කරන බවද ඇමැතිවරිය පැවැසුවාය. 
අත්‍යවශ්‍ය ආයතනවලට අඛණ්ඩ විදුලි සැපයුමක් ලබාදීම සඳහා එම ආයතනවල නියෝජිතයන් පිරිසක් සමග ඊයේ (8) පැවැති සාකච්ඡාවකින් අනතුරුව ඇමැතිවරිය එම අදහස් පළ කළාය.