( තිළිණි ද සිල්වා )
 
අගවිනිසුරු නලින් පෙරේරා මහතා ලබන 28 වැනිදා සිය ධුරයෙන් විශ්‍රාම යෑමට නියමිතව ඇතැයි ශ්‍රේෂ්ඨාධිකරණ ආංරංචි මාර්ග සදහන් කරයි.

විශ්‍රාම යාමට නියමිත වත්මන් අගවිනිසුරු නලින් පෙරේරා මහතාට සමුදීමේ චාරිත්‍රානුකුල නිල හමුවක් අද(5) ශ්‍රේෂ්ඨාධිකරණයේ දී පැවැත්විණි.

ශ්‍රේෂ්ඨාධිකරණ උත්සව ශාලාවේ පැවති මෙම සමු දීමේ නිල හමුව සඳහා ශ්‍රේෂ්ඨාධිකරණ, අභියාචනාධිකරණ, මහාධිකරණ සහ කොළඹ කලාපයේ මහේස්ත්‍රාත් අධිකරණවල සේවය කරන සියලුම විනිසුරුවරු එක්ව සිටියහ.

මෙහිදී ද වත්මන් අගවිනිසුරු නලීන් පෙරේරා මහතාගේ සේවය අගය කරමින් නීතිපති ජයන්ත ජයසූරිය මහතා මෙන්ම ශ්‍රී ලංකා නීතිඥ සංගමය සභාපති ජනාධිපති නීතිඥ කාලිංග ඉන්දතිස්ස මහතා අදහස් පළ කළහ.

පසුව අගවිනිසුරු නලීන් පෙරේරා මහතා කියා සිටියේ තම ධුර කාලය තුළ අධිකරණයේ ස්වාධීනත්වය උපරිම ආකාරයෙන් ආරක්ෂා කිරීමට තමා කටයුතු කළ බවයි.

අගවිනිසුරුවරයෙකු ගේ කාර්යභාරය ඉතා බරපතල මෙන්ම සංකීර්ණ බව පෙන්වා දුන් අගවිනිසුරු නලීන් පෙරේරා මහතා එම කාර්යය තමන් මැනවින් ඉටුකිරීමට සියලු උත්සාහ දැරූ බවත්  නලින් පෙරේරා මහතා වැඩිදුරටත් කියා සිටියේය. මෙම නිල හමූව  සඳහා නීතිඥවරු විශාල පිරිසක් එක්ව සිටියහ.

ජනාධිපති මෛත්‍රීපාල සිරිසේන මහතා  විසින් අගවිනිසුරු නලින් පෙරේරා මහතා ඉකුත් වසරේ ඔක්තෝබර් 22 වැනිදා  එම ධූරයට පත් කරන ලදී.

අගවිනිසුරු ධූරයට පත් වීමෙන් පසුව නලින් පෙරේරා මහතා ගේ ඉතා සුවිශේෂී තීන්දු රැසක් ශ්‍රේෂ්ඨාධිකරණය හමුවේ ප්‍රකාශයට පත් කළ අතර එලෙස ප්‍රකාශයට පත් කළ තීන්දු අතර ජනාධිපති මෛත්‍රීපාල සිරිසේන මහතා විසින් පාර්ලිමේන්තුව විසුරුවා හැරීම ව්‍යවස්ථා විරෝධී බවට අගවිනිසුරුවරයා ප්‍රමුඛ සත් පුද්ගල විනිසුරු මඩුල්ල ඒකමතිකව තීන්දු කිරීම විශේෂ වේ.