‘කොවිඩ්-19’ හෙවත් කොරෝනා වසංගතය ව්‍යාප්ත වීම ආරම්භ වූ චීනයේ හුබෙයි පළාතේ වූහාන් නගරයට පනවා තිබූ සංචාරක සීමා ඉවත් කිරීමට එරට බලධාරීහු අද (8) පියවර ගත්හ.

චීනයේ වූහාන් නගරයෙන් කොරෝනා වයිරසය ව්‍යාප්ත වීමට පටන් ගත්තේ පසුගිය වසරේ දෙසැම්බර් මාසයේදීය. වයිරසයේ ව්‍යාප්තිය පාලනය කිරීම සඳහා චීන බලධාරීහු දැඩි පියවර රැසක් ගත් අතර ජනවාරි මස අගදී නගරය සම්පූර්ණයෙන්ම වසා දැමූහ.

හුබෙයි පළාතේ වූහාන් නගරයට පනවා තිබූ සංචාරක සීමා අද (8) උදෑසන සිට ඉවත් කිරීමට චීන බලධාරීන් පියවර ගත් අතර මාර්තු මස අගදී ද හුබෙයි පළාතට සහ වූහාන් නගරයට පනවා තිබූ ඇතැම් සීමා ලිහිල් කිරීමට ද බලධාරීන් පියවර ගෙන තිබිණි.

කොරෝනා වයිරසය ව්‍යාප්ත වීමට පටන් ගැනීමෙන් පසු අඟහරුවාදා දිනය (7) චීනයෙන් කොරෝනා මරණයක් වාර්තා නොවූ පළමු දිනය ලෙස සටහන් විය.

බදාදා දිනයේදී පමණක් චීනයෙන් කොරෝනා ආසාදිතයන් 62 දෙනකු වාර්තා වූ අතර ඔවුන් සියලුදෙනාම විදෙස්ගතව සිට පැමිණි අය යැයි චීනයේ ජාතික සෞඛ්‍ය කොමිසම නිවේදනය කළේය..

අඟහරුවාදා වනවිට චීනයේ සිටින විදෙස්ගතව සිට පැමිණි කොරෝනා ආසාදිතයන්ගේ සංඛ්‍යාව 1,042ක් විය. එය ඊට පෙර දිනයට වඩා 59ක වැඩිවීමකි. ඒ අනුව අද පස්වරු වනවිට චීනයෙන් වාර්තා වූ සමස්ත කොරෝනා ආසාදිතයන්ගේ ගණන 82,783ක් විය.

අල්ජසීරා/රොයිටර්ස් 

055