ගෝලීය වසංගතයක් බවට පත්ව තිබෙන නව කොරෝනා වයිරසය හේතුවෙන් ලොවපුරා මියගිය සංඛ්‍යාව අද (3) පස්වරු වනවිට 53,000 ඉක්මවා ගියේය.

ඇමෙරිකා එක්සත් ජනපදයේ ජෝන්ස් හොප්කින්ස් විශ්වවිද්‍යාලය අද (3) පස්වරුවේ නිකුත් කළ දත්තවලට අනුව ‘කොවිඩ්-19’ යනුවෙන් නම් කර තිබෙන නව කොරෝනා වයිරසය හේතුවෙන් ලොවපුරා මියගිය ගණන 53,179ක් ලෙස දැක්විණි. එම දත්තවලට අනුව අද පස්වරු 4 වනවිට ලොව පුරා කොරෝනා ආසාදිතයන්ගේ ගණන දස ලක්ෂය ඉක්මවා ගොස් තිබූ අතර සමස්ත ගණන 1,017,693ක් විය.

නව කොරෝනා වයිරසය ගෝලීය වසංගතයක් ලෙස ප්‍රකාශයට පත් කර තිබෙන අතර වයිරසය හේතුවෙන් ගෝලීය සෞඛ්‍ය අර්බුදයක් මෙන්ම ආර්ථික අර්බුදයක් ද ඇති වී තිබේ.
 
රටවල් සහ පරිපාලන ප්‍රදේශ 200කට වඩා  ව්‍යාප්ත වී තිබෙන නව කොරෝනා වයිරසයෙන් වැඩිම බලපෑමක් එල්ල වී ඇත්තේ ඉතාලියටය. වැඩිම කොරෝනා ආසාදිතයන් ගණනක් වාර්තා වන්නේ ඇමෙරිකා එක්සත් ජනපදයෙනි.

දෙවැනියට සහ තෙවැනියට වැඩිම ආසාදිතයන් ගණනක් වාර්තා වන්නේ ඉතාලියෙන් සහ ස්පාඤ්ඤයෙනි. ඇමෙරිකා එක්සත් ජනපදයේ රෝහල් රෝගීන්ගෙන් පිරී ගොස් ඇති අතර ඉදිරි සති දෙක තුළ දී හදිසි ප්‍රතිකාර ලබන රෝගීන්ට අත්‍යවශ්‍ය ඖෂධ අවසන් වනු ඇතැයි යුරෝපය අනතුරු අඟවා ඇත.
 
පසුගිය දින අටක කාලයේදී වාර්තා වූ කොරෝනා ආසාදිතයන්ගේ ගණන දෙගුණ වී ඇත.ලොවපුරා පළමු කොරෝනා ආසාදිතයන් 500,000 වාර්තා වීමට දින 75ක් ගත විය. සමස්ත කොරෝනා ආසාදිතයන්ගෙන් සියයට 22ක් වාර්තා වන්නේ ඇමෙරිකා එක්සත් ජනපදයෙනි. 
 
 ගෝලීය කොරෝනා ආසාදිතයන්ගේ  සමස්ත සංඛ්‍යාවෙන් ඉතාලියෙන්  හා ස්පාඤ්ඤයෙන් වාර්තා වන ගණන ප්‍රතිශතයක් ලෙස සියයට 11කි. වයිරසය ව්‍යාප්ත වීමට පටන් ගත් චීනයෙන් වාර්තා වන ගණන සමස්ත සංඛ්‍යාවෙන් සියයට 8කි.