කොරෝනා වයිරසය ව්‍යාප්ත වීම හේතුවෙන් ඊජිප්තුවේ මේ වනවිට පනවා ඇති රාත්‍රී ඇඳිරි නීති කාලය මුස්ලිම්වරුන්ගේ ශුද්ධ වූ රාමසාන් මාසය සඳහා පැයකින් කෙටි කිරීමට පියවර ගෙන ඇත.

අගමැති මොස්ටාෆා මැට්බුලි මේ බව නිවේදනය කල අතර ඒ අනුව මින්පෙර රාත්‍රී 8.00ට ආරම්භ වූ ඇඳිරි නීතිය හෙට (24) වනදා සිට රාත්‍රී 9.00ට ආරම්භ වේ.

කෙසේවුවද රාමසාන් සමයේ සිදුකරන පොදු ක්‍රියාකාරකම් හා බොහෝ පිරිසක් එක්රැස් වී සිදුකරන යාඥා මෙහෙයන් තවදුරටත් තහනම් කර තිබේ.

පවුලේ සාමාජිකයන් පමණක් එක්වී ආගමික වතාවත් සිදුකරන ලෙසට උපදෙස් දී තිබේ.

අගමැතිවරයා පවසා සිටියේ ආහාර බෙදාහැරීම් වැනි සමහර කටයුතු සඳහා ආපනශාලා විවෘත කිරීමට පියවර ගෙන ඇති බවයි.

කෙසේ වුවද ආසාදන වාර්තා වීම වැඩි වන්නේ නම් නැවතත් වාරණ ක්‍රියාත්මක කෙරෙනු ඇති බවද ඔහු පැවසීය.

මාර්තු මාසයේ සිට ඊජිප්තුවේ ගුවන්තොටුපල සහ ආපනශාලා වසා දමා ඇත.

ඊජිප්තුවේ මේ වනවිට කොරෝනා ආසාදිත රෝගීන් 3 659ක් වාර්තා වී ඇති අතර මරණ 276ක් සිදුවී තිබේ.


(රොයිටර් පුවත් ඇසුරිණි - 085)