(කුෂාන් ජයවරධන)  

මිනිස් පරිභෝජනයට නුසුදුසු බී ලූණු කිලෝ 3000 කට ආසන්න ප්‍රමාණයක් කැකිරාව උඩනිදිගම ප්‍රදේශයේ නිවසක් තුළ තිබියදී කැකිරාව සෞඛ්‍ය වෛද්‍ය නිලධාරි කාර්යාලයේ මහජන සෞඛ්‍ය පරීක්ෂකවරු විසින් අද (17) සොයා ගනු  ලැබීය.

මෙම බී ලූණු තොගය යළි පිරිසිදු කර වෙළදපලට අලෙවි කිරීම සඳහා සූදානම් කර තිබූ බව  මහජන සෞඛ්‍ය පරීක්ෂකවරු සඳහන් කළහ.

මහජන සෞඛ්‍ය පරීක්ෂකවරුන්ට ලද තොරතුරක් අනුව  සිදුකරන ලද වැටලීමකදී එම ලූණු තොගය සොයා ගැනීමට හැකිව තිබිණ.

වැටලීම සිදුකරන අවස්ථාවේදීත් ප්‍රධාන සැකකරු තවත් පිරිසක් සමඟ බී ලූණු තොගය පිරිසිදු කරමින් සිට ඇත.

සැකකරු මෙලෙස රැගෙනවිත් ඇත්තේ දඹුල්ල විශේෂ ආරථීක මධ්‍යස්ථානයෙන් ඉවත දමන ලද බී ලූණු තොගයක් බවට  මහජන සෞඛ්‍ය පරීක්ෂකවරුන් විසින් සිදුකරන ලද විමර්ශනවලදී අණාවරණය කර ගෙන තිබේ.

අදාළ බී ලුණූ තොගය ඇතුළත් නිවස මුද්‍රාතැබීමට මහජන සෞඛ්‍ය පරීක්ෂකවරු කටයුතු කළහ.

මෙම ජාවාරම සිදුකර ඇත්තේ කැකිරාව උඩනිදිගම ප්‍රදේශයේ පදිංචි 40 හැවිරිදි පුද්ගලයෙකි.

සැකකරැ බැදුම්කරයක් මත මුදා හැරීමට මහජන සෞඛ්‍ය පරීක්ෂකවරු  එහිදී  කටයුතු කළ අතර එම සැකකරු හා ඔහු සන්තකයේ තිබූ මිනිස් පරිභෝජනයට නුසුදුසු බී ලූණු තොගය හෙට (18) කැකිරාව දිසා / මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබේ.