(නිමන්ති රණසිංහ)
 
නාවික හමුදාවේ සාමාජිකයින් 439 දෙනෙකු මේ වන විට කොරෝනා වයිරසය ආසාදිතව ඇතැයි යුධ හමුදාපති ලූතිනන් ජනරාල් ශවේන්ද්‍ර සිල්වා මහතා පැවසීය.
 
එම සාමාජිකයින්ගෙන් 61 දෙනෙකු පී සී ආර් පරීක්ෂණ සිදුකර පූර්ණ සුවය ලබා මේ වන විට රෝහල්වලින් බැහැර වී ඇති බවත්, මේ වන විට නාවික හමුදා සාමාජිකයින් 378 දෙනෙකු රෝහල්ගතව ප‍්‍රතිකාර ලබමින් සිටින බවත් යුධ හමුදාපතිවරයා ස`දහන් කළේය.
 
යුධ හමුදාපතිවරයා මේ බව සදහන් කළේ කොවිඞ් 19 පැතිරීම වැළැක්වීමේ ජාතික කි‍්‍රයාන්විත මධ්‍යස්ථානයේ අද (13)  සවස පැවැති මාධ්‍ය හමුවකදීය.
 
ති‍්‍රවිධ හමුදාව විසින් පවත්වාගෙන යනු ලබන පූනානි (පුද්ගලයින් 12), පම්පේමඩු (පුද්ගලියින් 129), දම්මින්න (පුද්ගලයින් 69) සහ නාවික හමුදා පවුල් නිරෝධායන මධයස්ථාන (පුද්ගලියන් 98) යන නිරෝධායන මධ්‍යස්ථාන වෙතින් පුද්ගලයින් 435 දෙනෙකු නිරෝධායන කි‍්‍රයාවලියෙන් අනතුරුව පී සී ආර් පරීක්ෂණය සිදුකර අද (13) සිය නිවෙස් වෙත පිටත් කර හරින ලද බවද යුධ හමුදාපතිවරයා සදහන් කළේය.
 
ඒ අනුව, අද (13) දින වන විට ත්‍රිවිධ හමුදාව විසින් පවත්වාගෙන යනු ලබන නිරෝධායන මධ්‍යස්ථාන තුළින් පුද්ගලයින් 8099 දෙනෙකු නිරෝධායන කි‍්‍රයාවලිය අවසන් වී ඔවුන්ගේ නිවෙස් වෙත පිටත් කර හැර ඇතැයි ද යුධ හමුදාපතිවරයා පැවසීය.
 
ත්‍රිවිධ හමුදාව මගින් පාලනය කරනු ලබන නිරෝධායන මධ්‍යස්ථාන 40ක පුද්ගලයින් 3444 දෙනෙකු මේ වන විට නිරෝධායනය වෙමින් සිටින බව ද යුද හමුදාපතිවරයා වැඩිදුරටත් සදහන් කළේය.