(නිමල් ජයරත්න)

කොළඹ සිට නිරෝධායනය සඳහා වැලිකන්ද ගල්කන්ද යුද හමුදා කඳවුරට රැගෙන ආ පිරිස අතරින් පුද්ගලයින් 25 දෙනෙකු මත්ද්‍රව්‍ය වලට ඇබ්බැහිවීම හේතුවෙන් අද (06) සවස ඔවුන් පොළොන්නරුව මහේස්ත‍්‍රාත් අධිකරණයට ඉදිරිපත් කිරීමෙන් අනතුරුව ලබාදුන්  නියෝගයකට අනුව මාස අටක කාලයක් පුනරුත්ථාපන කටයුතු සඳහා කන්දකාඩු පුනරුත්ථාපන කඳවුර වෙත යොමුකළ බව වැලිකන්ද පොලිසිය කියයි.

මොදර, කොළඹ, මාතර , පිටකොටුව යන ප‍්‍රදේශවලින් ඔවුන් දින 21 ක කාලයක් නිරෝධානය කටයුතු සඳහා ඉකුත් අපේ‍්‍රල් 16 වෙනිදා වැලිකන්ද ගල්කන්දේ පිහිටි නිරෝධායන මධ්‍යස්ථානයට රැගෙනවිත් ඇති බව පොලිසිය පවසයි.

එහිදි යුද හමුදාව සහ ශ‍්‍රී ලංකා පොලිසිය මගින් ඔවුන් මත්ද්‍රව්‍ය වලට ඇබ්බැහි වී ඇති බවට හදුනාගැනිමෙන් අනතුරුව අද පොළොන්නරුව මහේස්ත‍්‍රාත් අධිකරණයට ඉදිරිපත් කිරිමෙන් පසු එම පුද්ගලයින් 25 දෙනා මාස අටක කාලයක් පුනරුත්ථාපනය සඳහා යොමු කරන ලෙස මහේස්ත‍්‍රාත් සුරංග අසේල ද සිල්වා මහතා එම නියෝග කළේය.

ඒ අනුව දින 21 කාලයක් කන්දකාඩු පුනරුත්ථාපන කඳවුර තුල නිරෝධායනයට ලක් කරමින් ඔවුන්ට මාස 08 ක විවිධ වෘත්තිය පුහුණු ලබා දිමටද කටයුතු කර ඇති බව වැලිකන්ද පොලිස් ස්ථානාධිපති පොලිස් පරික්ෂක ලසන්ත බණ්ඩාර මහතා සඳහන් කළේය.

ඒ සෙඳහා ඔවුන්ට අවශ්‍ය සියලූ පහසුකම් කන්දකාඩු පුනරුත්ථාපන කඳවුර තුල සුදානම් කර ඇති අතර එලෙස පුනරුත්ථාපනය වෙන පුද්ගලයන්ගේ වයස අවුරුදු 25 ත් 50 අතර පසුවන්නන් බවද පොලිසිය සඳහන් කරයි.