විනීතා එම් ගමගේ

කොවිඞ් 19 වයිරසය ආසාදනය වී මෙරට රෝහලකට ඇතුල් කළ වයස්ගතම රෝගියා වන 94 හැවිරිදි පාතිමා සම්පූර්ණ සුවය ලබා ඉකුත් දා අයි ඞී එච් රෝහලෙන් පිටව ගියාය.

අසාධ්‍ය තත්ත්වයෙන් වැලිකන්ද රෝහලේ සිට අයි ඞී එච් රෝහලට එවනු ලැබ තිබුණු ඇය මාසයකට ආසන්න කාලයක් තිස්සේ එම රෝහලේ ප‍්‍රතිකාර ලැබුවාය.

කන්දකාඩු නිරෝධායන මධ්‍යස්ථානයේ දී කොවිඞ් 19 වයිරසය ආසාදනය වී ඇති බවට හදුනාගෙන වැලිකන්ද රෝහලට ඇතුළත් කර සිටි ඇය එම රෝගය හේතුවෙන් ඇතිවූ දැඩි පාචන තත්ත්වයට මුහුණ දී ඇති අතර මේ නිසා අයි ඞී එච් රෝහලට මාරු කර එවා තිබිණි.

ඇය සුවපත් කරන්නට රෝහල් කාර්ය මණ්ඩලය දැඩි පරිශ‍්‍රමයක් යොදන්නට සිදුවූ බවත් වයස් ගත රෝගීන්ට බරපතල හානි සිදුවනබැවින් ඇය පිළිබද සුවිශේෂී අවධානයකින් ප‍්‍රතිකාර කළ බවත් ඇය සම්බන්දව තොරතුරු විමසූ අවස්ථාවේ අයි ඞී එච් රෝහලේ නිලධාරිනියක් ලංකාදීපයට පැවැසුවාය.

සුවවී රෝහලෙන් පිටව යන ඇයට රෝහල් කාර්ය මණ්ඩලය සුභපතමින් තෑගි බෝග ද පිරිනැමූ බවත් රෝහල් කාර්ය මණ්ඩලයට ස්තුති කරමින් පිටව ගිය බවත් එම නිලධාරිනිය තව දුරටත් කීවාය.