තුර්කි ජනපති රිසෙප් ටයියීප් එර්දොගාන් මහතා සිය මාස 7 ක වැටුප කොරෝනා වයිරසය මැඩපැවැත්වීම සඳහා පරිත්‍යාග කර ඇතැයි වාර්තා වේ.

ජාතික සහයෝගිතා ව්‍යාපාරය ආරම්භ කරමින් ඔහු මෙම පරිත්‍යාගය සිදුකර තිබේ.

කැබ්නට් අමාත්‍යවරුන් හා නීතිවේදීන් ද මේ සඳහා අමෙරිකානු ඩොලර් අට ලක්ෂයකට ආසන්න මුදලක් පරිත්‍යාග කර ඇත.

වෛරසය පැතිරීම වැළැක්වීම සඳහා ගනු ලබන ක්‍රියාමාර්ගවලදී ආර්ථික වශයෙන් දැඩි පීඩාවට ලක්වන අඩු ආදායම්ලාභී පුද්ගලයින්ට සහන සැලසීම මෙම ව්‍යාපාරයේ අරමුණක්  බව ජනපතිවරයා පැවසීය.

මේ අතර වයිරසයට එරෙහිව කටයුතු කිරීම සඳහා ගන්නා ක්‍රියාමාර්ග කිහිපයක් ද ප්‍රකාශයට පත්කර ඇත.

නගාරාන්තර ගමනාගමනයට සීමා පැනවීම, සියලු ජාත්‍යන්තර ගුවන් ගමන් අවලංගු කිරීම සහ සතිඅන්ත දිනවලදී එළිමහන් ස්ථාන වසා දැමීම ඒවා අතර වෙයි.

තුර්කියෙන් මේ වන විට වයිරසය ආසාදිත රෝගීන් සංඛ්‍යාව 10,827 ක් වාර්තා වන අතර සිදුවී ඇති මරණ සංඛ්‍යාව 168 කි.

(සීඑන්එන් ඇසුරෙනි)

-226-