නිමාලි කහවල

කටුනායක ජාත්‍යන්තර ගුවන් තොටු‍පළෙහි සේවයේ නියුතුව සිටි හොරණ, කඳන ප්‍රදේශයේ පදිංචි යුද හමුදා සෙබළෙකුට නව කොරෝනා වයිරසය ආසාදනය වී ඇති බව තහවුරු වීමත් සමඟ ඔහු පදිංචි නිවසේ සාමාජිකයින් ඇතුළුව ඔහු සමඟ සමීපව ඇසුරු කළ පවුල් තුනක සාමාජිකයින් සහ හොරණ ප්‍රදේශයේ වෙළඳසැල් 4 ක කාර්ය මණ්ඩල සේවකයින් ස්වයං නිරෝධායනයට ලක්කර තිබේ.

අදාළ යුද හමුදා නිලධාරියා විදේශයන්හි සිට මෙරටට පැමිණි ලාංකිකයින් සම්බන්ධයෙන් ගුවන් තොටුපළේදී සමීපව කටයුතු කර ඇති බව පැවසෙන අතර, ඔහු නිවාඩු ලබා හොරණ, කඳන පිහිටි සිය නිවසට පැමිණ යළි සේවයට වාර්තා කිරීමේදී කොරෝනා වෛරසය ආසාදනය වී ඇති බවට හඳුනාගෙන ඇති බව කළුතර ප්‍රාදේශීය සෞඛ්‍ය සේවා අධ්‍යක්ෂක වෛද්‍ය උදය රත්නායක මහතා පවසයි.

ඒ අනුව අදාළ හමුදා නිලධාරියාගේ පවුලේ සාමාජිකයින් ඇතුළුව තවත් පවුල් තුනක සාමාජිකයින් 15 දෙනෙක්ද, එම නිලධාරියා පැමිණි බවට හඳුනාගත් හොරණ නගරයේ වෙළඳසැල් හතරක සාමාජිකයින් 30 කට ආසන්න පිරිසක්ද ස්වයං නිරෝධායනයට ලක්කර ඇති බවත්, ඉදිරියේදී ලැබීමට නියමිත ඔවුන්ගේ පීසීආර් පරීක්ෂණ වාර්තාවන්ට අනුව ඉදිරි පියවර ගැනීමට නියමිත බවත් හොරණ සෞඛ්‍ය වෛද්‍ය නිලධාරී චානක මල්ලිකාරච්චි මහතා පවසා සිටී.

“එසේම අදාළ හමුදා නිලධාරියා එම වෙළඳසැල් වලට පැමිණි අවස්ථා වලදී සෞඛ්‍යාරක්ෂිත ක්‍රමවේදයන් නිවැරදි ආකාරයෙන් අනුගමනය කර ඇති බවත්, එම හේතුව නිසා ඔහුගෙන් වෙළඳසැල් වල ආශ්‍රිතයින්ට වෛරසය බෝවීමේ අවදානම අවම මට්ටමක පවතින බවත්, නමුත් එම අවම තත්ත්වයද ශුන්‍ය කිරීමේ අරමුණින් අදාළ වෙළඳසැල් වසාදැමීමට තීරණය කළ බවත්” වෛද්‍ය චානක මල්ලිකාරච්චි මහතා වැඩිදුරටත් පවසා සිටී.