ඉන්දියාවේ බටහිර ප්‍රදේශයේ වීථි වලට එක්රැස්වූ දහස් ගනනක සංක්‍රමණික කම්කරුවන් විසිරුවා හැරීම සඳහා කඳුළු ගෑස් ප්‍රහාර එල්ල කර ඇතැයි වාර්තා වේ.

ඉන්දියාවේ බටහිර සුරත් නගරයේ රැස්ව සිටි පිරිසක් පොලිසිය සමග ගැටුම් ඇතිකරගැනීමෙන් පසු පොලිසියට ගල් මුල් වලින් දමාගැසූ බව බලධාරීහු පවසති.

පොලිසිය පවසන්නේ කලහකාරීව හැසිරුණු 93දෙනකු අත්අඩංගුවට ගත් බවයි.

කොරෝනා වයිරසය මැඩපැවැත්වීම සඳහා ඉන්දියානු රජය විසින් සති තුනක අගුලු දැමීමක් ප්‍රකාශයට පත්කිරීමත් සමග රැකියා අහිමිවූ විශාල පිරිසක් ගම්බිම් බලායාම සඳහා රැස්වී සිටි බව මාධ්‍ය වාර්තා කර තිබිණි.

මොවුහු දිල්ලි, මුම්බායි වැනි විශාල නගර වල සේවය කරන දුගී කම්කරුවන් වේ.

ගම්බද පෙදෙස් වල පිහිටි සිය නිවෙස් කරා යෑමට ප්‍රවාහන පහසුකම් නොමැති වීම හේතුවෙන් මොවුහු අසරණ වී සිටියහ.
බොහෝ දෙනකු කිලෝමීටර් ගනනාවක් දුර පයින් ගමන් කළ බව වාර්තා විය.

ඉන්දියාවේ මේ වනවිට කොරෝනා ආසාදිත රෝගීන් 1071ක් වාර්තා වී ඇති අතර 29 දෙනකු මියගොස් තිබේ.

ඉතාලිය හා චීනය සමග සසඳන විට ඉන්දියාවේ වාර්තා වී ඇත්තේ අඩු රෝගීන් සංඛ්‍යාවකි. 

එසේ වුවද එරට සෞඛ්‍ය බලධාරීන් පවසන්නේ ඉදිරි සති කිහිපය වඩාත් අවදානම් බවයි.

ඉන්දියාවේ පවතින දුර්වල මහජන සෞඛය පද්ධතිය හේතුවෙන් ඉදිරියේදී රෝගීන් සංඛ්‍යාව විශාල වශයෙන් ඉහල යැමට ඉඩ ඇති බවටද ඔවුහු අනතුරු අඟවති.


(රොයිටර් පුවත් ඇසුරිණි - 085)