තිස්සගේ මතක වත-77

අපේ රටේ දේශපාලන ඉතිහාසයේ අමතක නොවන සිදුවීම් ගැන කතා කරද්දි පාර්ලිමේන්තුවට බෝම්බ ප්‍රහාරයක් එල්ලවීමේ සිදුවීම විශේෂ එකකි.


ඉන්දු - ලංකා ගිවිසුමත් එක්කම රටේ විවිධ නොසන්සුන්තාවන් ඇති වුණා. එකක් තමයි දේශප්‍රේමී ජනතා ව්‍යාපාරයේ නැගී සිටීම. ඒක දේශපාලන මුහුණුවරකට වඩා ආයුධ සන්නද්ධ කණ්ඩායමක් විදියට තමයි ඉස්මතු වුණේ. ඒක භීෂණකාරී වටපිටාවක් ඇති කරන්න සමත් වෙච්ච එකක්. ඉන්දු - ලංකා ගිවිසුම අත්සන් කිරීමත් එක්කම වගේ මේ දේශප්‍රේමී ජනතා ව්‍යාපාරයේ කඩාකප්පල්කාරී ක්‍රියාකාරකම් සිද්ධ වෙන්න පටන් ගත්තා. පොදු දේපළ විශාල වශයෙන් විනාශ වුණා ඔවුන් අතින්. පුද්ගල ඝාතන, බියවැද්දීම්, පහරදීම් පවා සිද්ධ වුණා. ඉන්දීය සම්භවයක් ඇති අයට විශේෂ වශයෙන් මෙතනදි තර්ජන එල්ල වුණා.


ඉන්දියන් භාණ්ඩ වර්ජනය කරන්න කියල මේ අය ලොකු ප්‍රචාරයක් ගෙනිච්චා.


ඒ කාලේ රාජ්‍ය ඖෂධ නීතිගත සංස්ථාවේ සභාපතිනිය වශයෙන් කටයුතු කළේ ග්ලැඩිස් ජයවර්ධන. ඒ නෝනා ජේ. ආර්. ජයවර්ධන ජනාධිපතිතුමාගේ ඥාතිවරියක්. ඒ සභාපතිනිය ඉන්දියානු බෙහෙත් ආනයනය කරනවා කියන කාරණය උඩ දේශප්‍රේමී ජනතා ව්‍යාපාරයේ ඝාතකයන් එතුමියට මහ පාරේදි වෙඩි තියලා ඝාතනය කළා. මේක එක අතකින් ජේ. ආර්. ජයවර්ධන මැතිතුමාටත් එල්ල කෙරුණු ප්‍රහාරයක්. මේ තත්ත්වයෙන් භීතියට පත් වෙච්ච බොහෝ දෙනා ඉන්දීය බඩු කඩවල්වල ප්‍රදර්ශනය කරන එක පවා නැවැත්වූවා.


මීට සමගාමීව දේශප්‍රේමී ජනතා ව්‍යාපාරය ප්‍රබල එක්සත් ජාතික පාක්ෂිකයන්ට සහ ප්‍රාදේශීය සංවිධායකවරුන්ට දැඩි ලෙස තර්ජන එල්ල කළා. සමහරු ඝාතනය කළා. එක්සත් ජාතික පක්‍ෂය වෙනුවෙන් කටයුතු කිරීමෙන් වළකින්න කියලා ඒ අය තර්ජනය කළා. එහෙම නොකරපු අයව ඝාතනය කරන්න තරම් තත්ත්වය දරුණු වුණා.


දේශපාලන නායකයෝ, භික්‍ෂූන් වහන්සේලා, විශ්වවිද්‍යාල ආචාර්යවරු ඇතුළු විශාල පිරිසක් දේශප්‍රේමී ජනතා ව්‍යාපාරයේ තුවක්කුවලට ගොදුරු වුණා. මේ තත්ත්වය පාලනය කරන්න ජේ. ආර්. ජයවර්ධන ජනාධිපතිතුමා ලොකු වෙහෙසක් ගත්තා. හමුදා ක්‍රියාන්විත සිද්ධ වුණා. ඒත් තත්ත්වය  එන්න එන්නම දරුණු වුණා. එක්සත් ජාතික පක්‍ෂ විරෝධී ජනතා සහායත් දේශප්‍රේමී ජනතා ව්‍යාපාරයට ලැබුණු බවකුත් පේන්න තිබුණා.
මේ තත්ත්වය පාලනය කරන්න ජේ. ආර්. ජයවර්ධන ජනාධිපතිතුමාට ලොකු ඕනෑකමක් තිබුණා. ඒකට හමුදා පාලනය දැඩි කරනවා වගේම ඉන්දු - ලංකා ගිවිසුමට අනුව බලය බෙදීමේ ක්‍රියාමාර්ගයකටත් යන්න ඔහු කල්පනා කළා. මේ සඳහා අවශ්‍ය අණපනත් පාර්ලිමේන්තුවට ගෙනල්ලා, සම්මත කර ගැනීමේ සූදානමකුත් මේ අතරේ සිද්ධ වුණා. මේ වැඩ කටයුතු සිද්ධ වෙන අතරේ මේ සඳහා අවශ්‍ය කෙටුම්පත් පාර්ලිමේන්තුවට ඉදිරිපත් කරන දවසෙ රටේ ලොකු කලබලකාරී තත්ත්වයක් ඇති වුණා. පාර්ලිමේන්තු මන්ත්‍රීවරුන්ටත් මේ පිළිබඳව තර්ජන එල්ල වෙමින් තිබුණේ බලය බෙදන පළාත් සභා පනතට සහයෝගය දෙන්න එපා කියලා තමයි මන්ත්‍රීවරුන්ට තර්ජන එල්ල වුණේ. ඒක නිසා මන්ත්‍රීවරුන්ගේ ආරක්ෂාව ගැන අවධානය යොමු කරන්නත් ආණ්ඩුවට සිදුවුණා. එදා පනත සම්මත කරන දවසේ මැති ඇමැතිවරු පාර්ලිමේන්තුවට එක්ක ගියේ දැඩි රැකවල් මැද්දේ. ඊට කලින් දවසේ සමහර මැති ඇමැතිවරු කොළඹට ගෙන්නගෙන හෝටල්වල නතර කරගෙන ඉඳලා තමයි පහුවැනිදා පාර්ලිමේන්තුවට එක්ක ගියේ. “ඉන්ටර්කොන්ටිනෙන්ටල්” හෝටලයෙත් ශාවස්තියෙත් සමහරු නවාතැන් ගත්තා. ඒවට ඉහළ පොලිස් ආරක්ෂාවක් දාලා තිබුණේ. මේ අය පාර්ලිමේන්තුවට එක්ක ගියේ එකම වෙලාවේ.


එදා පාර්ලිමේන්තුව පටන් ගන්න කලින් උදේ වරුවෙ ජේ. ආර්. ජයවර්ධන ජනාධිපතිතුමාගෙ මූලිකත්වයෙන් විශේෂ රැස්වීමක් පැවැත්වූවා. ඒ පළාත් සභා පනත් කෙටුම්පත පිළිබඳව පාර්ලිමේන්තු මන්ත්‍රී කණ්ඩායම් රැස්වීම අගමැති ප්‍රේමදාස මැතිතුමා ඇතුළු සියලු මැති ඇමැතිවරුන් වගේ මේකට සහභාගි වුණා. මේ රැස්වීම යන අතරේ එක පාරටම පාර්ලිමේන්තුව ඇතුළෙ බෝම්බයක් පිපිරුණා.

 


තව කොටසක් ලබන සතියට....

 

 

 

ප්‍රියන්ත කොඩිප්පිලි