(විනීතා එම් ගමගේ)

කොවිඩ් 19 ඇතුළු රෝග පාලන කටයුතුවල දී නිසි බලධාරියා විසින් නිකුත් කරන චක්‍රලේඛයක් මගින් මහජන සෞඛ්‍ය පරීක්ෂකවරුන්ට බලතල ලබා දීමට දැනටමත් හැකියාව ඇතැයි රජයේ වෛද්‍ය නිලධාරින්ගේ සංගමයේ ලේකම් වෛද්‍ය සෙනාල් ප්‍රනාන්දු මහතා ප්‍රකාශ කළේය.

ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය සමඟ සාකච්ඡා කළ බවත්  මෙම බලතල භාවිතා කරමින් රාජකාරි කිරීම පිළිබඳව මහජන සෞඛ්‍ය පරීක්ෂකවරුන්ගේ අවදානය යොමු වූ බවත් හෙතෙම සඳහන් කළේය.

1897 දී පැනවුණු නිරෝධායන පනතට මේ වසරේ මාර්තු 19 වැනිදා පැනවුණු රෙගුලාසි අනුව කටයුතු කළ හැකි බව ද අවශ්‍ය නම් නිසි බලධාරියා වන සෞඛ්‍ය සේවා අධ්‍යක්ෂ ජනරාල්වරයාට තවදුරටත් රෙගුලාසි නිකුත් කළ හැකි බවත් ප්‍රනාන්දු මහතා පෙන්වා දුන්නේය.

ඔවුන සතු බලතල ගැන නිසි වටහා ගැනීමක් නොමැතිවීම නිසා මහජන සෞඛ්‍ය පරික්ෂකවරුන් මෙසේ වෘත්තිය ක්‍රියාමාර්ගයකට අවතීර්ණ වී යැයි පෙනී යන බව කී වෛද්‍ය නිලධාරින්ගේ සංගමයේ ලේකම්වරයා තම සංගමය හා සෞඛ්‍ය පරීක්ෂකවරුන්ගේ සංගමය අතර පැවැති සාකච්ඡාවේ දී මේ තත්ත්වය ගැන ගැඹුරින් සාකච්ඡා කළ බව ද කීය.

කෙසේ වෙතත් ඉතා පැරණි පනතක් වන නිරෝධායන පනතට සංශෝධන ගෙන ඒම අත්‍යවශ්‍ය බවත් එසේ සංශෝධන ගෙන එන්නේ නම් එය සියලු පාර්ශවයන් සමඟ එක්ව කළ යුතු බවත් හෙතෙම කියා සිටියේය.

මේ අනුව කොවිඩ් පාලන කටයුතු සහ මේ වනවිට නිකුත්ව ඇති මැතිවරණයට අදාල ගැසට් පත්‍රයට අදාලව ක්‍රියාත්මක වීමට මහජන සෞඛ්‍ය පරීක්ෂකවරුන් එකඟ වූ බව ද ලේකම්වරයා පැවැසීය.

කොවිඩ් මර්දන ක්‍රියාවලිය ප්‍රශස්ත මට්ටමින්  පවත්වා ගෙන යාම සඳහා සියලු පාර්ශ්ව මේ දක්වා ලබාදී ඇති සහයෝගය අඛණ්ඩව ලබා දීම මේ මොහොතේ ඇති ජාතික වගකිමක් යැයි ද හෙතෙම කියා සිටියේය.

වෛද්‍ය සෙනාල් ප්‍රනාන්දු මහතා මේ අදහස් පළ කළේ රජයේ වෛද්‍ය නිලධාරින්ගේ සංගම් කාර්යාලයේ දී අද (23) පැවති මාධ්‍ය හමුවක් අමතමිනි.

එහි දී  අදහස් දැක්වූ රජයේ වෛද්‍ය නිලධාරින්ගේ සංගමයේ සංස්කාරක හරිත අලුත්ගේ මහතා අලුතින් පැතිර ගිය කොරෝනා රැල්ල අතරින් තරමක් සක්‍රීය බවට පත්ව තිබුණේ රාජාංගන රැල්ල බවත් එය ද මේ වනවිට කලබල විය යුතු මට්ටමක නොමැති බව ද කියා සිටියේය.

කන්දකාඩුවේදී කොරෝනා ආසාදනය වූවන් හා ගෙවල්වල දී ආසාදනය වූවන් ඇතුළු අසාදිතයන් සමාජයේ දී සොයා ගත් නමුත් පළමු වළල්ලෙන් දෙවන වලල්ලට තෙවන වලල්ල දක්වා ද රෝගය පැතිර ගොස් තිබුණේ රාජාංගනයේ පොකුරෙන් පමණක් බවත් මේ වනවිට එය ද මර්දනය වෙමින් පවතින බවත් අලුත් ගේ මහතා තවදුරටත් සඳහන් කළේය.