(තිළිණි ද සිල්වා)

දුරස්ථව සිට අධිකරණ කටයුතු පවත්වාගෙන යාම හා නඩු ඇසීම සිදු කිරීම සදහා අධිකරණ අමාත්‍යාංශයට ලැප්ටොප් පරිගණක 55ක් පිරිනැමීමට එක්සත් ජාතීන්ගේ සංවර්ධන වැඩසටහන පියවර ගෙන ඇත.

අධිකරණ අමාත්‍ය ජනාධිපති නීතීඥ මොහොමඩ් අලි සබ්රි මහතා විසින් එක්සත් ජාතීන්ගේ සංවර්ධන වැඩසටහනින් කරන ලද ඉල්ලීමකට අනුව දුරස්ථව සිට අධිකරණ කටයුතු පවත්වාගෙන යාම හා නඩු ඇසීම සිදු කිරීම සදහා මෙම ලැප්ටොප් පරිගණක පිරිනමා ඇතැයි අධිකරණ අමාත්‍යාංශය කියා සිටී.

එක්සත් ජාතීන්ගේ සංවර්ධන වැඩසටහන අරමුදලෙහි මෙරට නේවාසික නියෝජිත රොබට් ජුකීම් මහතා විසින් අධිකරණ අමාත්‍ය ජනාධිපති නීතීඥ මොහොමඩ් අලි සබ්රි මහතා වෙත අදාළ පරිගණක නිල වශයෙන් බාර දෙනු ලැබිණි.

දුරස්ථව සිට සිදුකරන මෙම නඩු ඇසීමේ ක්‍රියාවලිය , අධිකරණ පද්ධතිය ඩිජිටල්කරනය කිරීමේ අධිකරණ අමාත්‍යාංශයේ දිර්ඝ කාලීන වැඩසටහනේ තවත් පියවරක් යැයිද අධිකරණ අමාත්‍යංශය කියා සිටී.

මෙම අවස්ථාවට ගරු අධිකරණ අමාත්‍ය ජනාධිපති නීතීඥ මොහොමඩ් අලි සබ්රි මැතිතුමා, අමාත්‍යාංශයේ ලේකම් එම්.එම්.පී.කේ.මායාදුන්නෙ, එක්සත් ජාතීන්ගේ සංවර්ධන වැඩසටහනේ මෙරට නේවාසික නියෝජිත රොබට් ජුකීම් යන මහත්වරුන් ඇතුලු අධිකරණ අමාත්‍යාංශයේ නිලධාරීන් හා එක්සත් ජාතීන්ගේ සංවර්ධන වැඩසටහනෙහි නියෝජිතවරු ද එක්වූහ.