(රංජිත් රාජපක්ෂ)

හැටන් ප්‍රදේශයේ පිහිටි ප්‍රධාන පාසලක ගුරුවරියකට කොවිඩ්-19 වයිරසය අසාදනය වී ඇති බවට තහවුරු වු නිසා එම පාසල විෂබීජහරණය කරන තෙක් අද(16) දින සිට තාවකාලිකව වසා දැමු බව හැටන් දික්ඔය නගර සභාවේ මහජන සෞඛ්‍ය පරීක්ෂකවරු පැවැසූහ.
 
ආසාදිත ගුරුවරිය සහ ඇයගේ පෙම්වතා හදිසියේ ඇති වු රෝගී තත්ත්වයකට ප්‍රතිකාර ලබා ගැනීම සදහා ඊයේ(15) දික්ඔය මූලික රෝහල වෙත ගිය අවස්ථාවේ ක්ෂණික ප්‍රතිදේහ පරීක්ෂණයට භාජනය කර ඇත. එහිදි ගුරුවරියට සහ ඇයගේ පෙම්වතාට කොවිඩ් -19 අසාදනය වී ඇති බවට තහවුරු වු බවත්, ගුරුවරිය වලපනේ සහ පෙම්වතා බගවන්තලාව නිරෝධායන මධ්‍යස්ථාන කරා යොමු කළ බවත් මහජන සෞඛ්‍ය පරීක්ෂකවරු කීහ.
 
ආසාදිත ගුරුවරිය ඉතා ආසන්න දිනයකදි පාසලේ ඉගැන්වීම් කටයුතු සිදු කර ඇති බවත්, ඇය 6 වසරේ සිට 11 වසර දක්වා පන්ති සදහා ඉගැන්වීම් කටයුතු සිදු කරන බව තහවුරුවී ඇති බවත් ඔවුහු පැවසුහ.
 
එම පාසලේ ළමුන් 1000ක් පමණ අධ්‍යාපනය ලබන අතර ආචාර්ය මණ්ඩලය 40 දෙනෙකුගෙන් සමන්විත වෙයි. ඒ අනුව පාසල තාවකාලිකව වසාදැමීමට පියවර ගෙන තිබේ.