අසල්වැසි ඉන්දියාවේ නව කොරෝනා වයිරස ආසාදිතයන්ගේ ගණන අද (16) මිලියන පහ ඉක්මවා ගියේය .
 
අසාධ්‍ය තත්ත්වයේ පසුවන දස දහස් ගණනක් රෝගීන්ට අවශ්‍ය ඔක්සිජන් සැපයීමට ද ඉන්දියාවේ රෝහල්වලට නොහැකි වී ඇතැයි වාර්තා වේ.
 
වයිරසයෙන් වැඩිම බලපෑමක් එල්ල වී ඇත්තේ මහාරාෂ්ට්‍ර, ගුජරාට් සහ උත්තර ප්‍රදේශ් යන් ප්‍රාන්තවලට ය. එම ප්‍රාන්තවල ඔක්සිජන් අවශ්‍යතාව තුන් ගුණයකින් වැඩි වී ඇතැයි ද වෛද්‍යවරුන් සහ ප්‍රාන්ත ආණ්ඩුවල නිලධාරීහු කීහ.
 
‘‘බලාපොරොත්තු සුන් වුණු රෝගීන් මට මහ රෑ කෝල් කරනවා. ඒත් මම දන්නේ නෑ ඊළඟ තොගය එන්නේ කවද්ද කියලා’’ යැයි නෂීක් නගරයේ ඔක්සිජන් සැපයුම්කරුවකු වන රිෂිකේෂ් පටිල් කී.
 
ඉන්දියාවෙන් බදාදා දහවලින් අවසන් වූ පැය 24 ක කාලයේදී නව කොරෝනා වයිරස ආසාදිතයන් 90,123 දෙනකු හඳුනාගත් අතර ඒ අනුව එරටින් වාර්තා වන වයිරස ආසාදිතයන්ගේ ගණන මිලියන පහ ඉක්මවා ගියේය.
 
ඉන්දියාවෙන් අවසන් පැය 24 ක කාලයේදී කොවිඩ්-19’ ආසාදිත මරණ 1, 290ක් වාර්තා වී ඇති අතර ඒත සමඟ එරටින් වාර්තා වන සමස්ත මරණ ගණන 82, 066ක් දක්වා ඉහළ ගියේය.
 
මේ වනවිට ලොව වේගයෙන්ම වයිරස ආසාදිතයන් වාර්තා වන රට බවට පත්ව ඇත්තේ ද අසල්වැසි ඉන්දියාවයි. ඉන්දියාවෙන් අවසන් වයිරස ආසාදිතයන් මිලියනය වාර්තා වීමට ගත වී ඇත්තේ දින 12ක් පමණි. ඇමෙරිකා එක්සත් ජනපදයට පසු වයිරස ආසාදිතයන් මිලියන පහක් වාර්තා වන අනෙක් රට වන්නේ ඇමෙරිකා එක්සත් ජනපදය යි.
 
දැනට වයිරස ආසාදිත රෝගීන් මිලියනයකට ආසන්න පිරිසක් ඉන්දියාවේ විවිධ රෝහල්වල ප්‍රතිකාර ලබන අතර ඉන් 6% ආසන්න පිරිසකට ඔක්සිජන් සහාය අවශ්‍යව ඇතැයි සෞඛ්‍ය අමාත්‍යාංශයේ නිලධාරියෙක් පැවැසීය.
 
රොයිටර්
055