ස්වසන රෝග පිළිබඳ විශේෂඥ වෛද්‍ය සුහර්ශි සිල්වා

කොවිඩ් වසංගතය පැතිර යමින් පවතින මේ කාලයේදී ඒ සදහා දැඩි අවදානමක් ඇති තවත් කාණ්ඩයක් ලෙස ස්වසන රෝගීන් හඳුන්වා දිය හැකියි. 

මෙහිදී ස්වසන රොගීන් යනුවෙන් හැඳින්වෙන්නේ  ඇදුම, C.O.P.D., බ්‍රොන්කෙක්ටාසස්, ILD වැනි තත්ත්ව වේ. මෙවැනි රෝගීහු   සාමාන්‍යයෙන් මාසික සායන සඳහා පැමිණේ. දිගුකාලීන ස්වසන රෝගයට ප්‍රතිකාර ලබා ගන්නා ඔබට මේ වනවිට කොවිඩ් මර්දන එන්නත ගැන ගැටලු ඇතිවිය හැකියි. ඒ හේතුවෙන්ම ඔබ තවමත් එන්නත්කරණයට ලක්වී නැතිව ඇති. කෙසේ වුවද ස්වසන රෝගීන්ට එන්නත ගැන ඇති ප්‍රධාන ගැටලුව වනුයේ එන්නත ලබා ගැනීමේන් රෝග ලක්ෂණ වැඩි විය හැකිද? නොඑසේ නම් එන්නත ගැනීම නිසා වෙනත් සංකූලතා ඇති විය හැකිද යන්නයි. 

එහෙත් ස්වසන රෝගියකුට කොවිඩ් -19 ආසාදනය වුවහොත් ඇති වන සංකූලතා අවම කිරීම උදෙසා එන්නත ලබා ගත යුතුම වේ. එම එන්නත කුමන වර්ගයේ එන්නතක් වුවද ප්‍රශ්නයක් නොවන අතර ලැබෙන පළමු එන්නත හැකි ඉක්මනින් ලබා ගත යුතුය. ස්වසන රෝගයකින් පීඩා විඳින ඔබගේ මුල්ම යුතුකම වන්නේ කොවිඩ් -19 රෝගය ආසාදනය වීමෙන් වැලකී සිටීමයි.  ඒ සඳහා ඔබ එන්නතේ මාත්‍රා දෙකම නිවැරැදිව ලබා ගත යුතු අතර ඊට පසුවද මෙතෙක් පවත්වා ගෙන ආ සෞඛ්‍ය පුරුදු දිගටම රැකිය යුතු බවද අවධාරණය කළ යුතු වේ.

-සටහන- මාධවී ධර්මරත්න