‘ එපා එපා මස් කන්නට කිරි අම්මාගේ‘  ගීතයෙන් කාගේත් හද බැඳගත් ජනප‍්‍රිය බයිලා ගායකයෙකු වූ නිහාල් නෙල්සන් යුරෝපා සංචාරයකට එක් වෙමින් ඔක්තෝබර් 16 වැනි ඉරිදා සවස 5.30 ට පැරීසියේ සෙන්ට් පියෙර් ශාලාවේදි සංගීත ප‍්‍රසංගයකට එක්වීමට නියමිතය.

නදීර නෝනිස් හා රොහාන්ද සිල්වා තරුණ පරපුරේ ගායකයන්ද ඔහු සමඟ ප‍්‍රසංඟ වේදිකාවේ ගී ගයන්නේය. පැරීසියේ චමින්ද ලිවේරා ප‍්‍රමුඛ චායා වෛබ්‍රේෂන් සංගීත කණ්ඩායම ඊට සංගීතයෙන් එක්වේ.

ප‍්‍රංශයේ ආසියාතික කලා සංසඳය සංවිධානය කරන මෙම ප‍්‍රසංගයෙන් ලැබෙන ලාභය ශ්‍රී ලංකාවේ අසරණ සිසු දරුවන්ට පාසැල් උපකරණ ලබාදීමට යොදවා ඇතැයි කලා සංසඳයේ සභාපති විමල් බණ්ඩාර මහතා පැවැසීය.

‘කිරි අම්මා‘ ගීය ගැයීමෙන් පසු තමන් මස් මාංශ කෑම අත්හළ බව නිහාල් නෙල්සන් එදා කීවේය. 70, 80 දශකයන්හී නිහාල් නෙල්සන් නොමැති ප‍්‍රසංඟ වේදිකාවක් නොමැති තරම්ය. එක් දිනකට සතර දිග්බාගයේ ප‍්‍රසංඟ වේදිකාව රසවත් කරවන නිහාල් නෙල්සන් එකල බයිලා ගායකයන් අතර සුවිශේෂි නමක් හිමිකර ගත් ගායකයෙකි. ගායනය හා ඔහුටම ආවේණික රංගනය ප‍්‍රසංඟ වේදිකා රසවත් කිරීමට සමත්විය.

1963 මාර්තු මස 31 වැනිදා ගුවන් විදුලියෙන් ප‍්‍රචාරයවූ ”ලස්සනට පිපුණු වන මල් ” ගීතයෙන් කලා ක්‍ෂේත‍්‍රයට පිවිසෙන ඔහු අඛණ්ඩ ජනප‍්‍රියත්වයක් සහිතව දශක 5ක කාලයක් ක්‍ෂේත‍්‍රයේ රැඳී සිටී. කැසට් පට 112 කට ගීත ගායනා කළ එකම ගායන ශිල්පියා වශයෙන්ද ගීත 5000 කට අධික ප‍්‍රමාණයක් ගායනා කරමින් ලාංකේය සංගීත කලාවට අපරිමිත සේවයක් කළ නිහාල් නෙල්සන් චිත‍්‍රපට 25 කට අධික සංඛ්‍යාවක ද ගීත ගායනා කර ඇත.

web-nihal--------------poster