ඕස්ට්‍රේලියානු දූපතක් වන තස්මේනියාවේ බටහිර වෙරළට ඔබ්බෙන් අතරමංව සිටින තල්මසුන් සියගණනක් බේරා ගැනීම සඳහා මෙහෙයුමක් ක්‍රියාත්මක කර ඇති බව එරට බලධාරීහු පවසති.

වැලි වැටියක් සහිත මෙම ස්ථානයේ නොගැඹුරු ජලයේ තල්මසුන් 270ක් පමණ සිරවී සිටින බවත් ඔවුන්ගෙන් 90 දෙනකු පමණ මියගොස් ඇති බවත් විද්‍යාඥයින්  ගණනය කර තිබේ.මෙලෙස අතරමංව ඇත්තේ පයිලට් වේල්ස් හෙවත් නියමු තල්මසුන් ලෙස හඳුන්වන සාගර ඩොල්ෆින් විශේෂයට අයත් සතුන් සමූහයකි.

ඔවුන්ගේ වැඩුණු සතෙකුගේ බර ටොන් තුනක් පමණ වන අතර මීටර් 7ක් දක්වා වර්ධනය වීමට හැකියාව ඇත.
අතරමංව සිටින තල්මසුන් ගැඹුරු දියට තල්ලු කිරීම හෝ ඇදගෙන යෑම සිදුකරන බව සත්ත්ව විද්‍යාඥයෝ පවසති.

ගලවාගැනීමේ ප්‍රයත්නයට රජයේ විද්‍යාඥයින් 40ක් පොලිස් නිලධාරීන් 20ක් මත්ස්‍ය වගාකරුවන් සහ ස්වෙච්ඡා සේවකයෝ පිරිසක් එක්ව සිටිති.කෙසේවුවද සත්ත්ව විශේෂඥයින් පවසන්නේ මෙය ඉතා දුෂ්කර කාර්යයක් බවයි.

මෙහෙයුම සඳහා දින කිහිපයක් ගතවනු ඇති බවත් මේ වනවිට මුදාගෙන ඇත්තේ තල්මසුන් 25 දෙනකු පමණක් බවත් ඔවුහු පවසති.

තල්මසුන් වෙරළාසන්න ප්‍රදේශ කරා පැමිණීම සුලභ සිදුවීමක් වුවත් මෙවන් විශාල සංඛ්‍යාවක් පැමිණ ඇත්තේ දශකයකට පමණ පසුව බව පැවසේ.2009 වසරේදී තල්මසුන් 200ක් පමණ ටස්මේනියාවේ වෙරළට පැමිණි බව වාර්තා වී තිබේ.

(රොයිටර් පුවත් ඇසුරිණි - 085)