(චන්ද්‍රසේන ගමගේ)

වෝහාරික විගණන වාර්තාවෙන් හෙළි වූ හා හෙළි  නොවූ  මහබැංකුව මංකොල්ලකාපු සියළු හොරුන්ට දඬුවම් දිය යුතු බව මගී කළමනාකරණ විදුලි බල හා බලශක්ති අමාත්‍ය මහින්ද අමරවීර මහතා අද (26) රන්න තලුන්න මහා විහාරයේ පැවති ආගමික උත්සවයකදී පැවසීය.

මේ රටේ දරුවන්ගේ දහම් අධ්‍යාපනය වැඩි දියුණු කිරීම සදහා මම මගේ වැටුප පරිත්‍යාගකර තිබෙනවා. අපි එහෙම කරන්නේ මේ දරුවන් සාරධර්ම වලින් පිරිපුන් දරුවන් බවට පත් කර මේ සමාජය සුවපත් කරන්නයි.හොරුන්ට දඩුවම් දෙන්නේ නැති සමාජයක අපේ උත්සාහය වතුරේ යනවා.

මේ රටේ වැඩිහිටියන්  පමණක් නොවෙයි මේ රටේ දරු පරපුර මේ රටේ දේශපාලකයින් හොරු කියල තේරුම් ගත්ත දවසට මේ සමාජය මොන පැත්තට යයිද කියල විශ්වාසයක් තියන්න පුළුවන් කමක් ලැබෙන්නේ නෑ.

අද ජනාධිපතිතුමා විශාල ආදර්ශයක් දෙමින් ඉන්නවා . මේ සමාජය වංචාවෙන් හා දූෂණයෙන් මුදවා ගන්න. එතුමා යම් වැඩ කොටසක් කරමින් ඉන්නවා. අපි එතුමාගේ ඒ වැඩ පිළිවෙලට සහයෝගය දෙනවා.අපිට විශ්වාසයක් තිබෙනවා මහබැංකු වංචාවට සම්බන්ධ සියළු දෙනාට දඩුවම් දෙන්න පමණක් නොව එම මුදල් අය කර ගන්නත් එතුමා කටයුතු කරයි කියා.