(ඩබ්. ඒ. පියතිලක)

හිඟුරක්ගොඩ ක්‍රිස්තු රාජාණන්ගේ  කතෝලික දේවස්ථානයේ  ආගමික සංහිඳියාවට මුල්තැන දෙමින් ඉතිහාසයේ පළමු වතාවට කුරුසය සහ ධර්ම චක්‍රය සහිතව වෙසක් කූඩු දේවස්ථානය පුරා අද (18) වෙසක් උත්සවය වෙනුවෙන් තරුණ සමිතියේ දරුවන් එක්ව වෙසක් කූඩු ප්‍රදර්ශනය කිරීමට කටයුතු කළ බව හිඟුරක්ගොඩ ක්‍රිස්තු රාජාණන්ගේ  කතෝලික දේවස්ථානයේ ගරු ජූඩ් සපරමාදු මීසම් සේවක පියතුමා කියයි.

ගරු ජුඩ් සපරමාදු මිසම් සේවක පියතුමා  මෙසේද කීය.

‘‘ලෝක සත්ත්වයාගේ හිතසුව පිණිස පන්සාලිස් වසක් දේශනා කළ ඒ දහම් මග කුමන තාරාතිරමක පුද්ගලයෙකු වුවත් පිළිපැදීම තුළින් දෙලොව යහපත සලසා ගතහැකි මාර්ගය අවබෝධ කරගැනීමට හේතු සාධක වන බවත්, තවද එය මේ රටේ උපන් බොදු සහෝදර සහෝදරියන්ගේ පමණක් නොව අප සැමගේම ද පොදු උරුමයයි. අප අදහන ආගම කුමක් වුවත් ඒ හැම ආගමකටම බුදු දහම සරු පසකි. එය එසේ වන්නේ කිතු දහම ඇතුළු ලොව ප්‍රධාන ආගම් සියල්ලේම පදනම ප්‍රේමය හෙවත් මෛත්‍රිය වන නිසාය. ක්‍රිස්තුන් වහන්සේ අපට උගන්වන්නේ දෙවියන් වහන්සේ යනු ප්‍රේමය කියායි.

කෙසේ නමුත් අපි මේ වෙසක් පෝය දිනය මුළු ලෝකයටම ආදර්ශයක් වෙමින් අප දේවස්ථානයේ තරුණ පිරිසද මෙම දේවස්ථානයේ සහායක පියතුමා වන  කේ. ලක්ෂ්මන් පියතුමා ඇතුළු එක්ව වෙසක් කුඩු ප්‍රදර්ශනය කලේ ආගමික සහ සියලු ජාතින්ගේ සංහිඳියාව පිළිබිඹු වීම සඳහාය.

විශේෂයෙන්ම මේ වසරේ අපට වෙසක් උත්සවය සමරන්නට සිදු වී ඇත්තේ වෙනදාටත් වඩා අපේ ආගමික පැවැත්ම පරීක්ෂාවට ලක්වන සමයකයි. වෛරය ආගමක කරගත් ත්‍රස්තවාදය අද ප්‍රේමයේ ආගම් සියල්ලටම බලවත් අභියෝගයක්ව ඇත. එහෙත් බද්ධ වෛරය හා ප්‍රචණ්ඩත්වය පරාජය කිරීමට හැක්කේ මෛත්‍රියට පමණි. එය අප අදහන සෑම ආගමක් ම අපට උගන්වන පරම සත්‍යයයි. එබැවින් එය අප ආධ්‍යාත්මික පැවැත්මේ කේන්ද්‍රය කරගැනීමට වෙර දරමු, වෛරයේ ගිනි නිවා සියල්ලන් සුවපත් කර උතුම් දැහැමියාවකට පියවර නගමු. ඔබ සැමට සුපින්බර වෙසක් මංගල්‍යයක් වේවා‘‘ යැයි පැවසීය.